کراچی میں گذشتہ روز ڈکیتی مزاحمت پر شہری کو بچوں کے سامنے قتل کرنے کا مقدمہ ڈیفنس تھانے میں درج کرلیا گیا۔ مقتول عامر رشتے داروں سے عید ملنے حیدرآباد جا رہا تھا۔

کراچی شہری ڈاکوؤں کے رحم کرم پر ہیں، گذشتہ روز دن دیہاڑے معصوم بچوں کے سامنے باپ کو قتل کر دیا گیا، مناظر کیمرے کی آنکھ میں ریکارڈ ہوگئے۔

ڈیفینس کے علاقے میں مقتول عامر کے بیٹے اور عینی شاہد نے بتایا کہ والد کے ساتھ حیدرآباد جا رہے تھے موٹر سائیکل سوار ملزمان نے میرے بابا کو گولیاں ماری دیں۔

مقتول عامر کے بیٹے نے فریاد کی جس طرح میرے والد کو مارا ہے اسی طرح ملزمان کو بھی سزا دی جائے۔

کراچی: ڈیفنس میں ڈکیتی مزاحمت پر ایک اور نوجوان کمسن بیٹے کے سامنے قتل کردیا گیا

علاقہ مکین کہتے ہیں واقعے کی ذمہ داری علاقہ پولیس پر عائد ہوتی اہلکار سارا دن پولیس وین میں بیٹھے موبائل فون استعمال کرتے ہیں۔

پولیس نے مقتول کے بھائی کی مدعیت میں مقدمہ درج کرکے تفتیش شروع کردی ہے۔

واضح رہے کہ گذشتہ روز کراچی میں ڈیفنس کے علاقے طوبیٰ مسجد کے قریب فائرنگ کا واقعہ پیش آیا، جس میں ایک نوجوان جاں بحق ہوگیا۔ جاں بحق ہونے والے شخص کی شناخت عامر کے نام سے ہوئی ہے۔

ڈکیتی کے دوران شہری کے قتل کی سی سی ٹی وی فوٹیج بھی سامنے آئی ہے، جس میں مقتول عامر کو گاڑی کے قریب کھڑے دیکھا جا سکتا ہے، جب ڈاکو وہاں پہنچے۔

فوٹیج میں ملزمان اور مقتول کے درمیان مزاحمت ہوتے دیکھی جا سکتی ہے۔

فوٹیج کے مطابق، مقتول کے ساتھ اس کا کمسن بیٹا بھی موجود تھا جو محفوظ رہا، تاہم ملزمان نے بچے کے سامنے ہی عامر پر فائرنگ کی اور فرار ہوگئے۔