پاکستان کرکٹ ٹیم کے اوپنر فخر زمان اور ون ڈے ٹیم کے کپتان محمد رضوان نے کیریئر کے مشکل ترین بولرز کے نام بتا دیے۔

پاکستانی کرکٹرز فخر زمان اور ون ڈے ٹیم کے کپتان محمد رضوان نے ان بولرز کے نام بتائے جنہیں کھیلنا ان کے کیریئر میں سب سے چیلنجنگ رہا۔

پاکستان کرکٹ بورڈ کی جاری کردہ عید اسپیشل ویڈیو میں فخر زمان، محمد رضوان اور نسیم شاہ نے سابق فاسٹ بولر وہاب ریاض کے ساتھ دلچسپ گفتگو کی۔

دورانِ گفتگو وہاب ریاض نے سوال کیا کہ اب تک کے کیریئر میں انہیں کس بولر کو کھیلنا سب سے مشکل محسوس ہوا؟

جس کا محمد رضوان نے جواب دیتے ہوئے کہا کہ جب انہوں نے انٹرنیشنل کرکٹ کا آغاز کیا تو آسٹریلیا کے جوش ہیزل ووڈ ان کے لیے سب سے مشکل بولر ثابت ہوئے لیکن وقت کے ساتھ ساتھ بھارت کے جسپریت بمراہ کو کھیلنا ان کے لیے سب سے زیادہ مشکل ہوگیا۔

فخر زمان نے اس سوال پر کہا کہ کنڈیشنز کے مطابق بولرز مشکل ثابت ہوتے ہیں لیکن اگر بات نئے گیند کی ہو تو انگلینڈ کے جوفرا آرچر کو کھیلنا سب سے مشکل لگا۔

دوسری جانب، فاسٹ بولر نسیم شاہ نے کسی بولر کا نہیں بلکہ ایک بیٹر کا نام لیا اور کہا کہ حالیہ وائٹ بال کرکٹ میں انہیں جوز بٹلر کو بولنگ کرنا سب سے چیلنجنگ لگا۔