وفاقی وزیر داخلہ محسن نقوی کی زیر صدارت اجلاس میں کاؤنٹر ٹیررازم کمیٹی نے دھماکہ خیز مواد کو وفاقی سبجیکٹ بنانے پر اتفاق اور دہشتگردی کا مسئلہ وزارت خارجہ کے ذریعے افغان حکومت کے سامنے اٹھانے کا فیصلہ کیا گیا ہے۔ انھوں نے کہا کہ دہشتگردی سے نمٹنے کیلئے سیاسی و عسکری قیادت، اسٹیک ہولڈرز ایک پیج پر ہیں۔

وفاقی وزیرداخلہ محسن نقوی کی زیرصدارت کاؤنٹر ٹیررازم کمیٹی کا اجلاس منعقد ہوا، اجلاس میں بہتر مانیٹرنگ یقینی بنانے کے لئے دھماکہ خیز مواد کو وفاقی سبجیکٹ بنانے پراتفاق کیا گیا، وزارت خارجہ کے ذریعے افغان حکومت کے سامنے دہشتگردی کے مسلے کو موثرطریقے سے اٹھانے کا فیصلہ بھی کیا گیا۔

وزیرداخلہ محسن نقوی کی زیر صدارت کاؤنٹر ٹیررازم کمیٹی کا اجلاس اسلام آباد میں ہوا، اجلاس میں صوبوں میں کاؤنٹر ٹیررازم ڈیپارٹمنٹ کی استعداد بڑھانے پر پیشرفت کا جائزہ لیا گیا۔

شرکا کو بریفنگ میں بتایا گیا کہ نیشنل انٹیلیجنس فیوژن اینڈ تھریٹ اسسمنٹ سنٹرزکے قیام کی منظوری دی جا چکی ہے۔ صوبوں میں پراونشل انٹیلیجنس فیوژن اینڈ تھریٹ اسسمنٹ سنٹرزکے قیام پرکام جاری ہے۔

وزیرداخلہ محسن نقوی نے کہا کہ ایف سی کی تنظیم نو کے بعد اسے نیشنل ریزرو پولیس میں تبدیل کیا جا رہا ہے، غیر ملکی شہریوں کی فول پروف سیکیورٹی کو یقینی بنائیں گے۔

محسن نقوی نے کہا کہ دہشتگردی سے نمٹنے کیلئے سیاسی و عسکری قیادت، اسٹیک ہولڈرز ایک پیج پر ہیں، صوبوں کی مشاورت کے بغیر کوئی فیصلہ نہیں کیا جائے گا۔

وزیر داخلہ نے مزید کہا کہ صوبائی سطح پر کاؤنٹر ٹیررازم ڈیپارٹمنٹ کو مکمل فعال کیا جانا انتہائی ضروری ہے۔ خیبر پختونخوا، بلوچستان کو ہرممکن مدد فراہم کریں گے۔ وفاقی سطح پرایف آئی اے کے کاونٹر ٹیررازم ونگ کو مکمل فعال کیا جائے گا۔