سیکیورٹی فورسز نے خیبرپختونخوا کے مختلف علاقوں میں 4 کارروائیوں کے دوران 11 خوارج دہشت گردوں کو ہلاک کردیا۔

پاک فوج کے شعبہ تعلقات عامہ (آئی ایس پی آر) کے مطابق خیبر پختونخوا کے مختلف علاقوں میں 26 اور 27 مارچ کو سیکیورٹی فورسز کی 4 الگ الگ کارروائیوں میں 11 خوارج ہلاک کردیا گیا۔

آئی ایس پی آر کے مطابق شمالی وزیرستان کے علاقے میر علی میں انٹیلی جنس بنیادوں پر آپریشن کیا گیا، جس میں سیکیورٹی فورسز نے خوارج کے ٹھکانے کو مؤثر انداز میں نشانہ بنایا اور آپریشن کے نتیجے میں 5 خوارج جہنم واصل ہو گئے۔

ترجمان پاک فوج کے مطابق اسی علاقے میں دوسری کارروائی میں مزید 3 خوارج کو کامیابی سے انجام تک پہنچایا گیا۔ شمالی وزیرستان کے علاقے میران شاہ میں ہونے والے ایک اور مقابلے میں سیکیورٹی فورسز نے 2 خوارج کو ہلاک کیا۔

آئی ایس پی آر کے مطابق چوتھی کارروائی ڈیرہ اسماعیل خان کے علاقے درابن میں کی گئی، آپریشن میں ایک خوارجی مارا گیا جبکہ ہلاک ہونے والے خوارج کے قبضے سے اسلحہ اور گولہ بارود بھی برآمد کیا گیا۔

ترجمان پاک فوج کا کہنا ہے کہ ہلاک دہشت گرد علاقوں میں دہشت گردی کی متعدد کارروائیوں میں سرگرم رہے، علاقے میں کسی بھی دوسرے خارجی کو ختم کرنے کے لیےسینیٹائزیشن آپریشن جاری ہے، سیکیورٹی فورسز ملک سے دہشت گردی کی لعنت کو ختم کرنے کے لیے پرعزم ہیں۔

صدر مملکت کا11 خوارج کو جہنم واصل کرنے پر فورسز کو خراج تحسین

صدر آصف زرداری نے فتنتہ الخوارج کے 11 دہشت گردوں کو جہنم واصل کرنے پر فورسز کو خراج تحسین پیش کرتے ہوئے کہا ہے کہ دہشت گردی کے خلاف جنگ میں پوری قوم سیکیورٹی فورسز کے ساتھ کھڑی ہے۔ ملک سے ہر قسم کی دہشت گردی کے مکمل خاتمے کے لئے پر عزم ہیں۔

صدر مملکت کا ملک سے فتنتہ الخوارج کے مکمل خاتمے کے عزم کا اعادہ کرتے ہوئے کہا کہ سیکیورٹی فورسز دہشت گردی کے خاتمے کے لیے کارروائیاں کر رہی ہیں۔

وزیراعظم کا سیکیورٹی فورسز کو خراج تحسین

وزیراعظم شہباز شریف کا ضلع شمالی وزیرستان کے علاقوں میر علی اور میران شاہ اور ضلع ڈیرہ اسماعیل خان کے علاقے درابن میں فتنتہ الخوارج کے دہشت گردوں کے خلاف کامیاب کاروائیوں پر سیکیورٹی فورسز کو خراج تحسین کیا ہے۔

وزیراعظم نے آپریشنز میں 11 خوارجی دہشت گردوں کو ہلاک کرنے پر سیکیورٹی فورسز کی ستائش اور کہا کہ دہشت گردی کے خلاف جنگ میں پوری قوم سیکیورٹی فورسز کے ساتھ کھڑی ہے۔

انہوں نے مزید کہا کہ ملک سے ہر قسم کی دہشت گردی کے مکمل خاتمے کے لئے پر عزم ہیں۔

قوم کو سیکورٹی فورسز کی بہادری پر فخر ہے، وفاقی وزیر داخلہ

وفاقی وزیر داخلہ محسن نقوی نے خیبرپختونخوا میں 4 کامیاب انٹیلیجنس بیسڈ آپریشنز پر سیکورٹی فورسز کو خراج تحسین پیش کرتے ہوئے کہا کہ قوم فورسز کے شانہ بشانہ کھڑی ہے، فورسز نے خیبرپختونخوا میں امن کے لیے قابل قدر اقدامات کیے۔ پاکستان میں امن و استحکام کے لیے ہر ممکن اقدامات کیے جا رہے ہیں۔