واشنگٹن: وزیراعظم کے معاون خصوصی طارق فاطمی نے اپنے دورہ واشنگٹن کے دوران اہم ملاقاتیں کیں۔ جن میں پاک امریکا تجارتی اور معاشی تعلقات کے فروغ پر تبادلہ خیال کیا گیا۔

واشنگٹن میں پاکستانی سفارت خانے کی جانب سے جاری بیان میں کہا گیا کہ امریکی رہنماؤں سے ملاقاتوں کے دوران معاون خصوصی نے حکومت پاکستان کی معاشی ترجیحات کو اجاگر کیا۔

حکام کو بتایا گیا کہ حکومت کی دن رات کوششوں کی بدولت معاشی اشاروں میں واضح بہتری آئی ہے ۔ آئی ایم ایف اور ورلڈ بینک کا اظہاراطمینان ثبوت ہے کہ معیشت درست سمت میں گامزن ہے، دونوں ملکوں میں تجارتی تعلقات کے فروغ کا بے انتہا پوٹینشل موجود ہے۔

وزیراعظم شہباز شریف کے معاون خصوصی طارق فاطمی نے نیشنل سیکیورٹی کونسل کے سینئر ڈائریکٹر برائے جنوبی ایشیا سے بھی ملاقات کی، جس میں جنوبی ایشیا کی سیکیورٹی اور دیگر اہم امور پر تبادلہ خیال کیا گیا۔

طارق فاطمی نے امریکی کانگریس کی خارجہ امور کمیٹی کے رینکنگ ممبر اور امور خارجہ کی ذیلی کمیٹی برائے جنوبی ایشیا کے ارکان سے بھی ملاقاتیں کیں، جس میں پاک امریکہ تعلقات اور علاقائی و بین الاقوامی صورتحال پر بات کی گئی۔

معاون خصوصی نے ریپبلکن پارٹی کے سینئر رہنما سے بھی ملاقات کی، جس میں دونوں ممالک کے درمیان باہمی تعلقات اور عالمی معاملات پر گفتگو کی گئی۔

اس سے قبل طارق فاطمی نے خارجہ امور کمیٹی کے چیئرمین برائن ماسٹ سے بھی ملاقات کے دوران پاکستان کی سیاسی اور سیکیورٹی صورتحال سے بھی آگاہ کیا، ان ملاقاتوں میں پاک امریکہ تعلقات، دوطرفہ تعاون اور معاشی تعلقات پر تفصیلی گفتگو کی گئی۔

طارق فاطمی نے کہا کہ تجارتی، معاشی اور سرمایہ کاری کے شعبہ جات میں تعلقات کا فروغ حکومت کی اولین ترجیحات میں شامل ہے۔ علاقائی اور بین الاقوامی معاملات بھی زیر غور آئے۔

یہ ملاقاتیں دونوں ممالک کے تعلقات کے حوالے سے اہم پیشرفت کی علامت سمجھی جا رہی ہے اور اس سے پاکستان کے امریکہ کے ساتھ تعلقات میں مزید استحکام کی امید ہے۔