گوادر کے علاقے کلمت میں مسلح افراد نے 6 افراد کو قتل کر دیا۔ مستونگ میں بھی کار پر فائرنگ سے سی ٹی ڈی اہلکار جاں بحق اور ایک شخص زخمی ہو گیا۔ صدر مملکت نے مذمت کرتے ہوئے کہا کہ دہشت گرد ملکی ترقی اور صوبے کی خوشحالی کی دشمن ہیں۔ وزیراعظم شہباز شریف نے کہا کہ شرپسند عناصرکی بزدلانہ کاروائیاں حیوانیت کی عکاسی کرتی ہیں۔ وزیر داخلہ محسن نقوی، وزیراعلٰی بلوچستان و دیگرنے بھی لواحقین سے اظہار ہمدردی کیا۔

پولیس کے مطابق گوادر کے علاقے کلمت میں نامعلوم مسلح افراد نے بس میں سوار مسافروں کو اتار کر ان پر فائرنگ کی جس کے نتیجے میں 5 افراد موقع پر ہی جاں بحق ہو گئے جبکہ ایک زخمی نے دوران علاج دم توڑ دیا۔

پولیس کا کہنا ہے کہ فائرنگ سے پانچوں افراد موقع پر جاں بحق ہوئے جبکہ ایک شخص زخمی ہوا۔ تاہم فائرنگ سے زخمی شخص بھی دوران علاج دم توڑ گیا جس کے بعد جاں بحق افراد کی تعداد 6 ہوگئی۔

پولیس کے مطابق جاں بحق افراد گوادر سے کراچی جا رہے تھے جس میں سے ایک شخص کا تعلق ملتان سے ہے جبکہ دیگر کی شناخت کا عمل جاری ہے۔

مستونگ میں کار پر فائرنگ

ادھر مستونگ میں کار پر فائرنگ سے سی ٹی ڈی اہلکارجاں بحق اور ایک شخمی زخمی ہو گیا۔ لیویز چوکی پر مسلح افراد نے گاڑی کو آگ لگا دی۔

کوئٹہ، نامعلوم ملزمان نے فائرنگ کے بعد گھر کو آگ لگا دی، ایک ہی خاندان کے 7 افراد جاں بحق

صدرمملکت کی مذمت

صدرآصف زرداری نے کلمت میں مسلح افراد کی فائرنگ کی مذمت کی ہے اوردہشت گرد حملے میں قیمتی جانی نقصان پراظہار افسوس کیا۔ صدرمملکت واقعہ میں جاں بحق افراد کے لواحقین کے ساتھ اظہار تعزیت کرتے ہوئے بیان میں کہا کہ دہشت گرد ملکی ترقی اور صوبے کی خوشحالی کی دشمن ہیں، دہشتگرد بلوچستان کو ترقی کرتا نہیں دیکھنا چاہتے۔

صدر آصف زرداری نے حملے میں زخمی افراد کی جلد صحتیابی اور جاں بحق افراد کے اہل خانہ کے لیے صبر کی دعا کی۔

وزیراعظم کی مذمت

وزیراعظم شہباز نے کلمت میں مسافروں پر فائرنگ کے واقعے کی سخت مذمت کی ہے، وزیراعظم نے 5 افراد کے جاں بحق ہونے پرگہرے دکھ کا اظہار کیا اور جاں بحق افراد کی بلندی درجات اور اہل خانہ کیلئے صبرکی دعا کی۔

وزیراعظم کی زخمی کوبہترین طبی سہولیات فراہم کرنے اور ذمہ داروں کوقرارواقعی سزایقینی بنانےکی ہدایت کی ہے۔ انہوں نے کہا ہے کہ شرپسندعناصربلوچستان کےامن وترقی کےدشمن ہیں، شرپسند عناصرکی بزدلانہ کاروائیاں حیوانیت کی عکاسی کرتی ہیں۔ شرپسند عناصرکے ملک دشمن عزائم کامیاب نہیں ہونے دیں گے۔

وزیراعظم نے سیکیورٹی فورسز کی ملک دشمنوں کے خلاف کاررائیوں کی پزیرائی کی۔ انہوں نے کہا کہ سیکیورٹی فورسزملک دشمن عناصرکے عزائم کو خاک میں ملا رہی ہیں۔ قوم کو سیکیورٹی فورسز اور قانون نافذ کرنے والے اداروں پر فخر ہے۔

وزیر داخلہ کی فائرنگ کے واقعہ کی مذمت

وفاقی وزیر داخلہ محسن نقوی نے کلمت میں مسافروں پر فائرنگ کے واقعے کی مذمت کرتے ہوئے کہا کہ دہشت گردوں نے بزدلانہ کارروائی کر کے معصوم لوگوں کو نشانہ بنایا۔

وزیر داخلہ محسن نقوی نے جاں بحق افراد کے لواحقین سے دلی ہمدردی و اظہار تعزیت کرتے ہوئے کہا کہ بے گناہ افراد کو ناحق قتل کرنا انسانیت سوز جرم ہے، شناخت کر کے مسافروں کو نشانہ بنانا بربریت اور درندگی ہے۔

محسن نقوی کا کہنا تھا کہ بزدلانہ کارروائیاں دہشت گردی کے خلاف قوم کے عزم کو کمزور نہیں کرسکتیں۔

وزیراعلیٰ بلوچستان کی کلمت میں دہشتگردی کی مذمت

وزیراعلیٰ بلوچستان سرفراز بگٹی نے کلمت میں دہشتگردی کی مذمت کرتے ہوئے کہا ہے کہ مسافروں کو بس سے اتار کر قتل کرنا بزدلانہ کارروائی ہے، دہشتگردوں نے بے گناہ شہریوں کو نشانہ بنایا۔

سرفراز بگٹی نے کہا کہ شناخت کے بعد مسافروں کو قتل کرنا ناقابل معافی جرم ہے، دہشتگردی کیخلاف عزم کو ایسی کارروائیوں سے کمزور نہیں کیا جا سکتا، جاں بحق افراد کے لواحقین کے غم میں برابر کے شریک ہیں۔

وزیراعلی بلوچستان نے مزید کہا کہ دہشتگردوں کیخلاف بھرپور جنگ جاری رہے گی، دہشتگردوں کومنطقی انجام تک پہنچائیں گے۔

یاد رہے کہ گزشتہ دنوں بلوچستان کے علاقے منگچر میں بھی فائرنگ کا واقعہ پیش آیا تھا جس میں پنجاب سے تعلق رکھنے والے 4 مزدور جاں بحق ہوئے تھے۔

اسسٹنٹ کمشنر منگچر علی گل کے مطابق نامعلوم مسلح افراد نے منگچر کی ملنگ زئی میں ٹیوب ویل کی تنصیب پر کام کرنے والے مزدوروں پر فائرنگ کی جس کے نتیجے میں چار افراد جاں بحق ہوگئے۔