ترجمان کے پی حکومت بیرسٹر سیف نے یومِ پاکستان پر پنجاب میں پی ٹی آئی کارکنوں کی پکڑ دھکڑ کی مذمت کرتے کہا ہے کہ فارم 47 کی وزیراعلیٰ رمضان میں بھی فسطائیت سے باز نہیں آ رہیں۔ جعلی راج کماری سعودی عرب سے احکامات دے رہی تھیں۔ کارکنوں کو مساجد سے بھی اٹھا کرجیلوں میں ڈال دیا گیا۔

مشیر اطلاعات خیبر پختونخوا بیرسٹر سیف کہتے ہیں پنجاب میں یومِ پاکستان منانے کی پاداش میں پی ٹی آئی کارکنوں کی پکڑ دھکڑ قابلِ مذمت ہے، جعلی راج کماری سعودی عرب سے پی ٹی آئی کارکنوں کی گرفتاری کے احکامات دے رہی تھی، گزشتہ رات مساجد سے بھی کارکنوں کو اٹھا کر جیلوں میں ڈال دیا گیا۔

بیرسٹر سیف کا کہنا تھا کہ فارم 47 کی وزیر اعلیٰ مریم نواز رمضان میں بھی فسطائیت سے باز نہیں آ رہی، معصوم کارکنوں کو صرف پاکستان اوربانی چیئر مین سے محبت کی سزا دی جا رہی ہے، یوم پاکستان پر پی ٹی آئی کارکنوں کی ریلیاں دیکھ کر جعلی حکومت پرخوف طاری ہے۔

انھوں نے کہا کہ یومِ پاکستان کے موقع پر عوام کے جمِ غفیر نے جعلی حکومت کے غیر مستند ہونے پر مہرِ تصدیق ثبت کر دی، عوام نے یومِ پاکستان کے موقع پر حقیقی آزادی کے عہد کی تجدید کی، یومِ پاکستان پر عوامی سمندر نے جعلی حکومت کے خلاف ریفرنڈم دے دیا۔

مشیراطلاعات کے پی نے کہا کہ یومِ پاکستان پر عوام نے حقیقی آزادی اور بانی چیئرمین کی رہائی کا عہد کیا ہے، خیبر سے کراچی تک عوام کے جمِ غفیر نے فارم 47 مافیا کو اس کی اصل حیثیت یاد دلا دی، اگر جعلی حکومت میں رتی برابر بھی شرم و حیا باقی ہے تو وہ فوراً مستعفی ہو جائے۔