سفید چہرہ، سرخ بال اور حیرت زدہ تاثرات—یہ رونلڈ میکڈونلڈ کی پہچان تھی، جو دہائیوں تک فاسٹ فوڈ جائنٹ میکڈونلڈز کا نمایاں چہرہ رہا۔ پہلی بار 1960 کی دہائی میں ٹی وی اشتہار میں نظر آنے والا یہ مسخرہ وقت کے ساتھ ساتھ میکڈونلڈز کے گولڈن آرچز، بگ میک اور ہیپی میل جتنا ہی مقبول ہوگیا۔

میکڈونلڈز کی مارکیٹنگ مہمات میں رونلڈ اکثر دیگر کرداروں جیسے میئر میک چیز، ہیمبرگلار، گریمس، برڈی دی ارلی برڈ اور فرائی کڈز کے ساتھ نظر آتا۔ کمپنی نے ہمیشہ کئی اداکاروں کو رونلڈ کے کردار میں ریستورانوں اور تقریبات میں بھیجا، تاہم ٹی وی اشتہارات میں صرف ایک ہی شخص کو اس کردار کے لیے منتخب کیا جاتا۔

متنازعہ شخصیت

رونلڈ میکڈونلڈ ہمیشہ ہی تنیقد کی زد میں رہا۔ 2011 میں، 550 سے زائد ڈاکٹروں اور صحت کے ماہرین نے اخبارات میں اشتہارات شائع کیے جن میں دعویٰ کیا گیا کہ بچوں کو فاسٹ فوڈ کی طرف راغب کرنے کے لیے ایک مسخرے کا استعمال ”غیر اخلاقی“ ہے اور اسے ریٹائر کر دینا چاہیے۔

پراسرار گمشدگی

اب تقریباً ایک دہائی سے یہ عالمی شہرت یافتہ کردار منظر عام سے غائب ہے، اور اس کی وجہ خاصی خوفناک ہے۔

2016 میں، دنیا بھر میں ایک ”ڈراؤنا مسخرہ“ مہم شروع ہوئی، جس میں لوگ خوفناک مسخرے کے لباس پہن کر عوام کو دہشت زدہ کرنے لگے۔ یہ سلسلہ سب سے پہلے امریکہ میں سامنے آیا، لیکن جلد ہی برطانیہ، آسٹریلیا اور برازیل تک پھیل گیا۔

امریکی ریاست ساؤتھ کیرولائنا کے شہر گرین ول میں لوگوں نے پولیس کو اطلاع دی کہ مسخرے بچوں کو جنگل میں لے جانے کی کوشش کر رہے ہیں۔ ”نیو یارک ٹائمز“ کے مطابق، امریکہ میں ان واقعات کی وجہ سے کم از کم 12 افراد کو گرفتار کیا گیا اور ایک شخص ہلاک بھی ہوا۔

پنسلوانیا کے شہر ریڈنگ میں ایک 16 سالہ لڑکے کو چاقو مار کر ہلاک کر دیا گیا، اور اطلاعات کے مطابق یہ واقعہ ایک مسخرے کے ماسک والے شخص کی اشتعال انگیزی کے نتیجے میں پیش آیا۔

برطانیہ میں یونیورسٹی کے ایک کیمپس پر چینسا چلاتے مسخرے کی ویڈیو وائرل ہوئی، جبکہ آسٹریلیا میں بھی پولیس نے ایک 19 سالہ شخص کو مقامی رہائشیوں کو ڈرانے کے جرم میں گرفتار کیا۔

میکڈونلڈز کا ردعمل

اس خوفناک رجحان کے بعد، میکڈونلڈز نے اعلان کیا کہ وہ رونلڈ میکڈونلڈ کی عوامی تقریبات میں شرکت محدود کر رہے ہیں۔

ایک بیان میں کمپنی نے کہا، ’میکڈونلڈز اور اس کے فرنچائز مالکان حالیہ واقعات سے بخوبی آگاہ ہیں اور اسی لیے رونلڈ میکڈونلڈ کی عوامی تقریبات میں شمولیت کے حوالے سے محتاط رویہ اپنایا جا رہا ہے۔‘

آہستہ آہستہ منظر سے غائب

2017 تک رونلڈ کچھ تقریبات میں نظر آتا رہا، مگر اس کا کردار آہستہ آہستہ ختم ہوتا گیا۔ آج، وہ مارکیٹنگ یا سوشل میڈیا پر بھی نظر نہیں آتا۔

تاہم، رونلڈ کی غیر موجودگی میں، اس کا ایک پرانا ساتھی 2023 میں دوبارہ مقبول ہوا—جامنی رنگ کا نرم و ملائم کردار ”گریمس“ نیویارک میٹس بیس بال ٹیم کے لیے خوش قسمتی کی علامت بن گیا۔