سیکیورٹی فورسز نے فوری اور مؤثر کارروائی کرتے ہوئے پاک افغان سرحد کے ذریعے دراندازی کی کوشش کرنے والے خوارج کی کوشش کو ناکام بنا دیا جبکہ شدید فائرنگ کے تبادلے میں تمام 16 خوارجی دہشت گردوں کو ہلاک کردیا گیا۔

پاک فوج کے شعبہ تعلقات عامہ (آئی ایس پی آر) کے مطابق 22 اور 23 مارچ کی درمیانی شب، شمالی وزیرستان کے علاقے غلام خان کلی میں پاکستان افغانستان سرحد کے ذریعے دراندازی کی کوشش کرنے والے خوارج کے ایک گروہ کی نقل و حرکت کو سیکیورٹی فورسز نے بروقت مانیٹر کیا۔

ترجمان پاک فوج نے بتایا کہ سیکیورٹی فورسز نے پاک افغان سرحد پر فوری اور مؤثر کارروائی کرتے ہوئے خوارجی دہشت گردوں کی دراندازی کی کوشش کو ناکام بنا دیا۔

آئی ایس پی آر کے مطابق سیکیورٹی فورسز اور خوارجیوں کے درمیان شدید فائرنگ کے تبادلے کے نتیجے میں تمام 16 دہشت گرد مارے گئے۔

پنجاب اور سندھ میں میں 12 پولیس اہلکاروں کی شہادت میں ملوث مرکزی ملزم سمیت 4 ڈاکو ہلاک

ضلع خیبر میں سیکیورٹی فورسز کا انٹیلی جنس بیسڈ آپریشن، 3 خوارج ہلاک

ترجمان پاک فوج کے مطابق پاکستان مسلسل عبوری افغان حکومت سے کہتا رہا ہے کہ وہ سرحد کے اطراف میں مؤثر بارڈر مینجمنٹ کو یقینی بنائے، توقع ہے کہ عبوری افغان حکومت اپنی ذمہ داریاں پوری کرے گی اورخوارج کی جانب سے پاکستان کے خلاف دہشت گردی کی کارروائیوں کے لئے افغان سرزمین کے استعمال سے روکے گی۔

ترجمان پاک فوج نے کہا کہ پاکستان کی سیکیورٹی فورسز اپنی سرحدوں کے تحفظ اور ملک سے دہشت گردی کے خاتمے کے لیے پرعزم ہیں، ہر قیمت پر اس ناسور کو جڑ سے اکھاڑ پھینکنے کے لیے مکمل طور پر تیار ہیں۔

وزیرِاعظم کا سیکیورٹی فورسز کو خراج تحسین

دوسری جانب وزیرِاعظم شہباز شریف نے پاک افغان بارڈر سے فتنہ الخوارج کی دراندازی کی کوشش ناکام بنانے پر سیکیورٹی فورسز کو خراج تحسین پیش کیا ہے۔

وزیرِاعظم نے سیکیورٹی فورسز کے افسران اور جوانوں کی پیشہ ورانہ صلاحیتوں کی تعریف کرتے ہوئے کہا کہ دہشت گردوں کے ناپاک عزائم کو کبھی کامیاب نہیں ہونے دیں گے، ملک کی دہشت گردوں سے حفاظت کے غیر متزلزل عزم میں پاک افواج کے شانہ بشانہ کھڑی ہے۔

وزیرداخلہ سیکیورٹی فورسز کو خراج تحسین

ادھر وفاقی وزیر داخلہ محسن نقوی نے پاک افغان بارڈر سے دراندازی کی کوشش ناکام بنانے پر سیکیورٹی فورسز کو خراج تحسین کیا ہے۔

محسن نقوی نے کہا کہ سیکیورٹی فورسز نے خوارجی دہشت گردوں کی شمالی وزیرستان میں دراندازی کو ناکام بنایا، سیکیورٹی فورسز نے دراندازی کرنے والے 16 خوارجی دہشت گردوں کو عبرتناک انجام تک پہنچایا۔

وزیر داخلہ نے 16 خوارجی دہشت گردوں کو جہنم واصل کرنے پر سیکیورٹی فورسز کی پیشہ وارانہ صلاحیتوں کو سراہا۔

اسپیکر قومی اسمبلی ایاز صادق کی دہشتگردوں کی دراندازی کی شدید مذمت

اسپیکر قومی اسمبلی ایاز صادق نے پاک افغان سرحد پر خوارجی دہشت گردوں کی دراندازی کی شدید مذمت کرتے ہوئے سیکیورٹی فورسز کی بروقت کارروائی کو سراہا۔

اسپیکر قومی اسمبلی نے 16 خوارجی دہشت گردوں کو جہنم واصل کرنے پر سیکیورٹی فورسز کی اعلیٰ صلاحیتوں کی تعریف کی۔

سردار ایاز صادق نے کہا کہ سیکیورٹی فورسز کا خوارجی دہشت گردوں کے خاتمے کے لیے غیر متزلزل عزم قابل ستائش ہے اور پوری قوم اس جنگ میں اپنی بہادر افواج کے ساتھ کھڑی ہے۔

انہوں نے ملکی سلامتی اور استحکام کے لیے قربانیاں دینے والے سیکیورٹی اہلکاروں کو خراج تحسین پیش کرتے ہوئے کہا کہ دہشت گردوں کے ناپاک عزائم کو کسی صورت کامیاب نہیں ہونے دیا جائے گا۔

اسپیکر قومی اسمبلی نے اس عزم کا اظہار کیا کہ پاکستان اپنی سرحدوں کے تحفظ کے لیے ہر ممکن اقدامات کرے گا اور دشمن قوتوں کو ناکامی کا سامنا کرنا پڑے گا۔