مشہورٹک ٹاکر اور کونٹینٹ کری ایٹر سحر مرزا کی والدہ نے اپنی بیٹی کی شادی کے ایک سال مکمل ہونے پر ایک حیران کن انکشاف کیا ہے۔ ان کا کہنا ہے کہ آج تک ان کا خاندان اپنے داماد سے نہیں ملا، حالانکہ سحر مرزا کی شادی کا فیصلہ پورے خاندان نے مل کر کیا تھا۔

سحر مرزا، علشبہ انجم اور جنت مرزا گزشتہ روز ایک نجی ٹی وی چینل کے مارننگ شو میں شریک ہوئیں، جہاں ان کی والدہ اور خالہ بھی ان کے ساتھ موجود تھیں۔ شو کے دوران میزبان ندا یاسر نے ان سے مختلف سوالات کیے، جن میں سے ایک سوال پر سحر مرزا کی والدہ نے بتایا کہ ان کی بیٹی کی شادی پہلی تھی اور ان کے داماد کی فیملی پاکستان میں مقیم ہے۔

عائزہ خان کا بھارتی فلم میں کام کرنے کا عندیہ

انہوں نے انکشاف کیا کہ ”ہمارا داماد بہت اچھا ہے، مگر ہم آج تک اسے مل نہیں پائے ہیں۔“ اس پر ندا یاسر بھی دنگ رہ گئیں۔ سحر مرزا کی والدہ نے مزید بتایا کہ ان کے داماد کے والدین نے رشتہ لے کر آ کر اسے طے کیا تھا، لیکن ویزا نہ ملنے کی وجہ سے وہ نہ تو شادی میں شریک ہو سکے اور نہ ہی ملاقات ہو سکی۔

سحر مرزا کی والدہ نے بتایا کہ شادی کی تمام تقریبات پاکستان میں دھوم دھام سے منعقد کی گئی تھیں، لیکن ان کے داماد کی غیر موجودگی میں یہ سب کچھ آن لائن کیا گیا تھا۔ شادی کے بعد سحر مرزا اپنے شوہر کے پاس برطانیہ پہنچ گئیں۔

انہوں نے یہ بھی کہا کہ جب ان کے داماد پاکستان آئیں گے، تو پھر سے تمام شادی کی تقریبات کا اہتمام کیا جائے گا۔ سحر مرزا نے گزشتہ سال فروری میں برطانیہ میں اپنے شوہر کے ساتھ آن لائن نکاح کیا تھا، جس کے بعد انہیں سوشل میڈیا پر شدید تنقید کا سامنا کرنا پڑا تھا۔ تاہم، سحر مرزا نے تنقید کا جواب دیتے ہوئے کہا تھا کہ ان کی شادی کے تمام تقریبات ان کے خاندان کی طرف سے تھیں، نہ کہ دولہے والوں کی طرف سے۔

سحر مرزا نے اس بات پر زور دیا کہ جب ان کا شوہر پاکستان آئیں گے، تو اس وقت شادی کی بڑی تقریبات ہوں گی، جو پہلے سے بھی زیادہ دھوم دھام سے ہوں گی۔