کراچی میں یوم شہادت حضرت علیؓ کے موقع پر مرکزی جلوس کے لیے ٹریفک پلان جاری کردیا گیا ہے۔

ٹریفک پولیس کے مطابق 21 رمضان المبارک (22 مارچ) کو مرکزی مجلس نشتر پارک میں منعقد ہوگی، جس کے اختتام پر دوپہر ایک بجے جلوس برآمد ہوگا۔

ٹریفک پولیس کے مطابق ایم اے جناح روڈ کو گرومندر سے ٹاور تک عام ٹریفک کے لیے بند رکھا جائے گا، جبکہ متبادل راستوں پر ٹریفک کی روانی برقرار رکھنے کے لیے ٹریفک پولیس کے اہلکار تعینات ہوں گے۔

جلوس نشتر پارک سے نمائش، ایم اے جناح روڈ، سی بریز سے صدر ایمپریس مارکیٹ پہنچے گا، پھر صدر ریگل سے گزرتے ہوئے تبت سینٹر پر دوبارہ ایم اے جناح روڈ پر آئے گا اور بولٹن مارکیٹ سے کھارادر حسینیہ امام بارگاہ پر اختتام پذیر ہوگا۔

ٹریفک پولیس کے مطابق ناظم آباد سے آنے والے افراد لسبیلہ چوک سے نشتر روڈ کے راستے گارڈن کی طرف جا سکتے ہیں۔ لیاقت آباد سے تین ہٹی، لسبیلہ چوک اور سینٹرل جیل کے راستے استعمال کیے جا سکتے ہیں۔ حسن اسکوائر سے پی پی چورنگی جانے والی ٹریفک کو کشمیر روڈ سے سوسائٹی لائٹ سگنل کی طرف بھیجا جائے گا، جبکہ جیل فلائی اوور سے تین ہٹی اور نشتر روڈ کی طرف ٹریفک کو موڑا جائے گا۔

شاہراہ قائدین سے نمائش جانے والی ٹریفک سوسائٹی لائٹ سگنل سے دائیں جانب کشمیر روڈ کا راستہ اختیار کرے گی۔ جمشید روڈ سے گرومندر کی طرف جانے والی ٹریفک بہادر یار جنگ روڈ اور سولجر بازار کے راستے اپنی منزل تک پہنچ سکے گی۔