بھارت کی ریاستی انسداد دہشت گردی اسکواڈ (اے ٹی ایس) اور ڈائریکٹوریٹ آف ریونیو انٹیلی جنس (ڈی آر آئی) کی احمد آباد زونل یونٹ نے پیر کی شام شہر کے پلڈی علاقے میں ایک بند فلیٹ پر چھاپہ مار کر 95.5 کلو گرام سونا، دیگر قیمتی اشیاء اور تقریباً 70 لاکھ روپے نقدی برآمد کر لی۔

یہ کارروائی اے ٹی ایس کو موصول ہونے والی ایک خفیہ اطلاع کی بنیاد پر کی گئی، جس میں بتایا گیا تھا کہ ایک باپ بیٹے کی جوڑی، جو ممبئی اور احمد آباد میں کاروبار کرتی ہے، مبینہ طور پر غیر قانونی طور پر قیمتی سامان ذخیرہ کر رہی ہے۔

مومو اور اسپرنگ رول بنانے والی فیکٹری کے فریج سے کتے کا سر برآمد

ذرائع کے مطابق، مشتبہ افراد کی شناخت میگھ شاہ اور ان کے والد مہندرا شاہ کے طور پر ہوئی ہے، جو احمدآباد میں مہالکشمی مندر کے قریب اویشکر اپارٹمنٹ میں رہائش پذیر تھے۔ بتایا جاتا ہے کہ انہوں نے تین سال قبل یہ فلیٹ کرائے پر لیا تھا، تاہم چھاپے کے وقت یہ گھر خالی تھا، جس کی وجہ سے ابھی تک مشتبہ افراد سے پوچھ گچھ نہیں کی جا سکی۔

تحقیقات سے وابستہ ایک اہلکار نے بھارتی میڈیا کو بتایا، ’ابتدائی معلومات کے مطابق، مشتبہ افراد اسٹاک بروکرز ہیں، جو احمد آباد اور ممبئی میں کاروبار کرتے ہیں۔ چونکہ برآمد شدہ قیمتی اشیاء کی مقدار بہت زیادہ ہے، اس لیے ان سے ملکیت کے ثبوت اور متعلقہ دستاویزات فراہم کرنے کو کہا جائے گا۔ فی الحال کوئی مقدمہ درج نہیں ہوا، لیکن اگر سونا اسمگل شدہ پایا گیا تو تحقیقات شروع کی جا سکتی ہیں۔‘

معروف سائنسدان نیوٹن کی دنیا کے خاتمے کے حوالے سے پیشگوئی، کونسا سال آخری ہوگا؟

ذرائع کا کہنا ہے کہ برآمد شدہ سونے کے حوالے سے ایک نظریہ یہ بھی ہے کہ یہ صرف باپ بیٹے کی ملکیت نہیں، بلکہ اس میں دیگر افراد کی رقم بھی شامل ہو سکتی ہے، جو ممکنہ طور پر ان کے ساتھ کاروباری تعلق رکھتے ہیں۔ تاہم، حتمی تصدیق مشتبہ افراد سے تفتیش کے بعد ہی ممکن ہوگی۔