پاراچنار میں سیکیورٹی خدشات کے پیش نظر سماجی تنظیم پاسدار شہری کمیٹی کے رضاکار مختلف علاقوں میں ڈیوٹی پر مامور ہیں۔

رضاکار پاراچنار شہر کے داخلی چیک پوسٹوں پر پولیس کے ساتھ ذمہ داری نبھا رہے ہیں، شہر سے باہر 13 چیک پوسٹیں اور شہر کے اندر ایک درجن سے زائد مختلف پوائنٹس قائم کیے گئے ہیں۔

پاسدار شہری کمیٹی کے صدر ملک اخلاق حسین کا کہنا ہے کہ پاراچنار کی کمزور سیکیورٹی کے باعث رضا کاروں کو تعینات کیا گیا ہے، رمضان المبارک کے دوران رضاکار بغیر کسی لالچ اور تنخواہ کے ڈیوٹی انجام دے رہے ہیں۔

ملک اخلاق حسین نے مزید کہا کہ پاراچنار میں سب سے زیادہ خودکش بم دھماکے ہو چکے ہیں اور رضاکاروں کی موجودگی کی وجہ سے پولیس کو کافی ریلیف ملا ہے۔

پاسدار شہری کمیٹی کے رضاکاروں کی خدمات کو مقامی شہریوں نے بھی سراہا ہے۔