کرائسٹ چرچ میں کھیلا گیا پہلا ٹی ٹوئنٹی پاکستان ٹیم کے لیے ڈراؤنا خواب ثابت ہوا ہے، نیوزی لینڈ نے باآسانی پاکستان کو نو وکٹوں سے شکست دے دی۔ میچ میں پاکستان کی بیٹنگ لائن مکمل طور پر ناکام رہی اور پوری ٹیم محض 91 رنز پر ڈھیر ہوگئی۔ قومی ٹیم نیوزی لینڈ کے خلاف ٹی ٹوئنٹی کرکٹ میں اپنے کم ترین اسکور پر آؤٹ ہوئی۔

پاکستانی اوپنرز محمد حارث اور حسن نواز بغیر کوئی رن بنائے پویلین لوٹ گئے، عرفان خان ایک، جبکہ کم بیک میچ میں شاداب خان تین رنز بنا کر آؤٹ ہوئے۔ خوشدل شاہ نے 32 اور کپتان سلمان آغا نے 18 رنز کی اننگز کھیلی۔ قومی ٹیم کے آٹھ کھلاڑی ڈبل فگر میں بھی داخل نہ ہوسکے۔

نیوزی لینڈ کے جیکب ڈفی نے چار اور کائل جیمی سن نے تین وکٹیں حاصل کیں۔

قومی ٹیم کے تین کھلاڑیوں کا ڈیبیو

نیوزی لینڈ کے خلاف پہلے ٹی ٹوئنٹی میں قومی ٹیم کے تین کھلاڑیوں نے ڈیبیو کیا، جن میں عبدالصمد، محمد علی اور حسن نواز شامل ہیں۔

ٹیم مینجمنٹ کی جانب سے تینوں کھلاڑیوں کو ڈیبیو کیپس دی گئیں، بیٹنگ کوچ محمد یوسف نے عبدالصمد، ہیڈ کوچ عاقب جاوید نے محمد علی اور شاداب خان نے حسن نواز کو کیپ دی۔