انڈین پریمئیر لیگ (آئی پی ایل) کے سابق چیف للِت مودی نے وانواتو کی شہریت حاصل کر لی ہے۔ زیادہ تر لوگ اس جزیرہ نما ملک سے ناواقف ہو سکتے ہیں، لیکن اب یہ ملک خبروں میں آ گیا ہے۔ للت مودی، جو 2010 سے بھارت سے باہر مقیم ہیں اور لندن میں رہائش پذیر بتائے جاتے ہیں، بھارتی قانون نافذ کرنے والے اداروں کو کروڑوں روپے کی مبینہ خرد برد کے الزامات میں مطلوب ہیں۔

بھارت کی وزارت خارجہ نے جمعہ کے روز تصدیق کی کہ للت مودی نے لندن میں بھارتی ہائی کمیشن میں اپنا بھارتی پاسپورٹ سرینڈر کرنے کی درخواست دے دی ہے۔

وانواتو: ایک مختصر تعارف

وانواتو کی سب سے بڑی پہچان اس کا ”گولڈن پاسپورٹ“ یا ”سٹیزن شپ بائی انویسٹمنٹ پروگرام“ ہے، جس کے تحت دولت مند افراد مخصوص سرمایہ کاری کے ذریعے اس ملک کی شہریت حاصل کر سکتے ہیں۔

بارہ مارچ سے پاکستان اور افغان شہریوں کا امریکا میں داخلہ بند ہونے کا خدشہ، ٹرمپ انتظامیہ نے نئی ویزا پالیسی کا اعلان کردیا

وانواتو کی شہریت کے فوائد:

• وانواتو میں شہریوں پر کوئی انکم ٹیکس عائد نہیں ہوتا۔
• اس ملک میں کیپیٹل گین ٹیکس بھی نہیں، جو اسٹاک مارکیٹ، رئیل اسٹیٹ، یا دیگر اثاثوں میں سرمایہ کاری کرنے والوں کے لیے فائدہ مند ہے۔
• یہاں وراثتی ٹیکس اور کارپوریٹ ٹیکس بھی نہیں لیا جاتا۔
• اگر کوئی کاروبار وانواتو میں رجسٹرڈ ہے لیکن اس کی آمدنی بیرون ملک سے ہو رہی ہے، تو اس پر کوئی ٹیکس نہیں لگے گا۔
• وانواتو میں گفٹ ٹیکس، اسٹیٹ ٹیکس یا وِدہولڈنگ ٹیکس بھی نافذ نہیں۔

ماہر امیگریشن زلاٹا ایرلاچ کے مطابق، وانواتو تیزی سے کرپٹو ہب کے طور پر ابھر رہا ہے۔ یہاں 32 ملین مربع فٹ پر محیط ”ساتوشی آئی لینڈ“ کو عالمی کرپٹو سینٹر بنانے کی منصوبہ بندی کی جا رہی ہے۔

وانواتو کی دیگر خصوصیات:

• یہاں سرکاری کرنسی ”وانواتو واتو“ (VUV) ہے، 2 روپے 36 پیسے کا ایک واتو بنتا ہے۔
• یہاں تین سرکاری زبانیں بولی جاتی ہیں: انگریزی، فرانسیسی اور بسلاما۔
• 2024 کے ”ہیپی پلینٹ انڈیکس“ میں وانواتو کو دنیا کا سب سے خوش ترین ملک قرار دیا گیا، اس سے قبل 2006 میں بھی یہ اعزاز حاصل کر چکا ہے۔

نئے ملک کی شہریت انتہائی سستے داموں فروخت کیلئے پیش

وانواتو کا سفر کیسے کریں؟

اگر آپ وانواتو جانا چاہتے ہیں تو آسٹریلیا کے شہر سڈنی سے محض تین گھنٹے کی فلائٹ کے ذریعے وہاں پہنچ سکتے ہیں۔ اس کے علاوہ نیوزی لینڈ، فجی اور دیگر پیسیفک ممالک سے بھی براہ راست پروازیں دستیاب ہیں۔

دلچسپ بات یہ ہے کہ 2020 میں وانواتو کی کل آبادی صرف 3 لاکھ تھی۔ جو کہ کئی پاکستانی چھوٹے شہروں سے بھی کم ہے۔