ماہ رمضان کی پہلی سحری کے دوران کراچی کے مختلف علاقوں میں گیس کی عدم فراہمی نے شہریوں کو مشکلات میں ڈال دیا۔

ملیر، رفاع عام سوسائٹی، ناظم آباد، گلبہار اور رنچھوڑ لائن سمیت کئی علاقوں میں سحری کے وقت گیس دستیاب نہیں تھی، جس کی وجہ سے شہریوں کو کھانے کی تیاری میں دشواری کا سامنا کرنا پڑا۔

سوئی سدرن گیس کمپنی (ایس ایس جی سی) نے اعلان کیا تھا کہ سحری کے اوقات میں رات 3 بجے سے صبح 9 بجے تک گیس فراہم کی جائے گی۔

تاہم شہریوں کا کہنا ہے کہ یہ محض دعوے ہی ثابت ہوئے۔ گیس کی بندش پر شہریوں نے شدید احتجاج کرتے ہوئے متعلقہ حکام سے فوری اقدامات کا مطالبہ کیا ہے۔