نائب ازبک وزیر دفاع، کمانڈر ائیر ڈیفنس و ائیر فورس میجر جنرل بورخانوف احمد جمال نے دورہ پاکستان کے موقع پر پاک فضائیہ کے سربراہ ائیر چیف مارشل ظہیر احمد بابر سدھو سے ملاقات کی، دونوں فضائی افواج کے سربراہوں نے باہمی دلچسپی امور اور دو طرفہ دفاعی تعاون کو فروغ دینے پر تبادلہ خیال کیا، ملاقات میں ازبکستان کی جانب سے پاکستان سے مزید مشاق طیارے خریدنے میں دلچسپی کا بھی اظہار کیا گیا۔

آئی ایس پی آر کے مطابق ایئر ہیڈ کوارٹرز میں ہونیوالی ملاقات میں مشترکہ تربیت اور تکنیکی اشتراک کار کے حوالے سے بھی امور زیر غور آئے، چیف آف ایئر اسٹاف نے پائلٹس کی بیسک سے ٹیکنیکل لیول ٹریننگ کے لیے پاک فضائیہ کے مکمل تعاون کی یقین دہانی کروائی، جبکہ انہوں نے ازبک فضائیہ کی استعداد کار میں اضافے کے لیے ٹیکنیکل ٹریننگ اور مینٹیننس کریو کی تربیت کے حوالے سے بھی تعاون کے عزم کا اعادہ کیا۔

اس موقع پر ازبک ایئر ڈیفنس و فضائیہ کے سربراہ نے پاک فضائیہ کے پیشہ ورانہ مہارت کو سراہا، جبکہ دونوں ممالک کی فضائی افواج کے سربراہوں کا دوطرفہ تعاون کو فروغ دینے کی عزم کا اعادہ کیا۔

میجر جنرل جمال نے ابھرتے ہوئے سیکیورٹی خطرات کے تناظر میں مشترکہ تربیت کی ضرورت پر زور دیا اور اپنے بیڑے میں مشاق طیاروں کی تعداد میں اضافے کی خواہش کا بھی اظہار کیا، پاک ازبک فضائی افواج کے سربراہوں نے بالخصوص سائبر اسپیس اور الیکٹرانک وار فیئر صلاحیتوں میں جامع تعاون پر بھی اتفاق کیا گیا۔