سابق وزیر اعظم شاہد خاقان عباسی نے کہا ہے کہ کرکٹ میچ کے لیے پورا ملک بند ہوتا ہے، آئین کے معاملے پر بند کمرے میں کانفرنس ہورہی ہے، ہمیں کانفرنس نہیں کرنے دی جا رہی۔

اسلام آباد میں اپوزیشن گرینڈ الائنس کی 2 روزہ قومی کانفرنس سے خطاب کرتے ہوئے سابق وزیراعظم شاہد خاقان عباسی نے کہا کہ ہمیں کرکٹ میچ کے لیے پورا ملک بند کرنا پڑتا ہے، آئین کے معاملے پر ایک بند کمرے میں کانفرنس ہے، یہ جلسہ نہیں مگر 3 بار کانفرنس کے لیے جگہ تبدیل کرنا پڑی، آئین کے حوالے سے کانفرنس نہیں کرنے دی جا رہی، حکومت کو خوف ہے کہ آئین کے نام پر کانفرنس نہیں ہوسکتی۔

شاہد خاقان عباسی نے کہا کہ ملک میں جمہوریت کے عمل پر بات ہو گی، قانون کی بالا دستی نہیں ہو گی تو ملک نہیں چلے گا، یہ وہ لوگ ہیں جو ایک زمانےمیں یہی باتیں کرتے تھے، یہ لوگ ملک سے سیاسی انتشار کو ختم نہیں کر سکتے۔

سابق وزیراعظم کا کہنا تھا کہ بدقسمتی ہے کہ بات نہیں کرنے دی جاتی، بات نہ کرنے کے حوالے سے قانون بنا دیا جاتا ہے،سیاسی جماعتوں میں ہمیشہ اختلاف ہوتا ہے، عدل کے نظام کی بات ہو گی تو ہم سب اکٹھے ہیں۔

انہوں نے مزید کہا کہ رات کے اندھیرے میں آئینی ترمیم ہوئی ہے، ملک میں عدم کے نظام کو ختم کر دیا گیا، آج چیف جسٹس وہ آدمی ہے جو ایک بینچ نہیں بنا سکتا، یہ ہمارے عدل کا نظام ہے۔

کوئی ملک ریاستی اداروں اور افواج کے بغیر نہیں چل سکتا، محمود اچکزئی

اس موقع پر کانفرنس سے خطاب کرتے ہوئے محمود خان اچکزئی نے کہا کہ کوئی ملک ریاستی اداروں اور افواج کے بغیر نہیں چل سکتا، ملک کو ملنے والی آزادی کے ثمرات نیچے تک نہیں گئے، ہمارے لوگوں کو حق حکمرانی میں شراکت دار نہیں بنایا گیا، حق مانگنے پر الزامات لگنے شروع ہو جاتے ہیں۔

محمود اچکزئی نے کہا کہ سینکڑوں سال جیل ہوئی مگر ہم پاکستان کے خلاف نہیں گئے، 8 فروری کے انتخابات میں آئین کی دھجیاں اڑائی گئیں، ہم اس ملک میں حق حکمرانی چاہتے ہیں، حق صرف آئین کی حکمرانی سے ہی ملے گا۔

ان کا کہنا تھا کہ عمر ایوب کے دادا نے میرے والد کو 14 سال کے لیے جیل میں ڈالا، خوشی ہے عمر ایوب اب یہ جمہوریت کی طرف آگئے ہیں، جو پیسے لیتا اور ضمیر بیچتا ہے اسے اہمیت اور ایماندار کو گھسیٹا جاتا ہے، خالد بن ولید کو دوران جنگ کہا گیا کہ آپ آرمی چیف نہیں ہیں، ہمیں اس قسم کا نظام لانا ہوگا، شہباز شریف اور اس کی پارٹی جھوٹ کو پرموٹ کر رہے ہیں۔

اسلام آباد میں آئین کی بالادستی وقانون کی حکمرانی سے متعلق دوروزہ قومی کانفرنس جاری،،کانفرنس میں تحریک انصاف ،،جے یوآئی سمیت اپوزیشن تمام جماعتیں شریک ہوئیں، مولانا فضل الرحمن کل قومی کانفرنس سے خطاب کرینگے۔

دو روزہ قومی کانفرنس میں تحریک انصاف، جے یو آئی سمیت اپوزیشن کی تمام جماعتیں شریک ہیں، مولانا فضل الرحمن ویڈیو لنک پر قومی کانفرنس سے خطاب کرینگے۔

قومی کانفرنس سے سیاستدان، وکلاء، صحافی، سمیت اہم شخصیات خطاب کرینگی۔ قومی کانفرنس موجوہ ملکی سیاسی صورتحال کے پیش نظر بلائی گئی ہے۔

قومی کانفرنس میں ملک بھر کی وکلا بارز کو بھی شرکت کی دعوت دی گئی۔ قومی کانفرنس میں عام انتخابات 2024 سمیت 26 ویں آئینی ترمیم پر بحث ہوگی۔