بالی وڈ کے معروف میوزک کمپوزر و گلوکار ہمیش ریشمیا نے اپنے کامیاب فلمی کیریئر کے حوالے سے اہم باتیں شیئر کرتے ہوئے اپنے ساتھی اداکار سلمان خان اور اکشے کمار کو اپنی کامیابی کا کریڈٹ دے دیا۔

ہمیش کا اپنی فنی زندگی میں سلمان خان اور اکشے کمار سے گہرا تعلق رہا ہے اور انہوں نے ان سپر اسٹارز کی کئی ہٹ فلموں کے گانے گائے ہیں جو مداحوں میں آج بھی مقبول ہیں۔

بھارتی میڈیا کو دیے گئے ایک حالیہ انٹرویو میں ہمیش نے اپنے کامیاب کیریئرمیں سلمان خان اور اکشے کمار کے کردار کا ذکر کیا۔

کہو نا پیار ہے: راکیش روشن کو فلم کا خوبصورت ترین جزیرہ کیسے ملا؟

ہمیش ریشمیا نے کہا کہ سلمان خان کی مدد سے ہی انہیں میوزک انڈسٹری میں اپنا مقام ملا۔ ”سلمان بھائی نے میری موسیقی کی صلاحیتوں کو پہچان کر مجھے ایک نیا موقع دیا، ورنہ میں آج سیریل پروڈیوسر ہی ہوتا۔“

انہوں نے مزید بتایا کہ ان کے والد کی تعلیم نے انہیں موسیقی سے محبت سکھائی، مگر وہ اپنی صلاحیتوں کو پہچاننے میں ناکام تھے۔ سلمان خان نے ان کے اندر چھپے میوزک کمپوزر کو پہچان کر اسے باہر نکلنے میں مدد کی جس نے ان کی زندگی بدل گئی اور آج وہ ایک کامیاب میوزک کمپوزر ہیں۔

فلم ”صنم تیری قسم“ کے عنوان کی تجویز دینے کے حوالے سے ہمیش نے بتایا کہ ان کا اس میں بھی ایک اہم کردار تھا۔ انہوں نے ایک ہٹ فلم کے عنوان کے طور پر ”صنم تیری قسم“ کا نام تجویز کر کے اس کی کامیابی کی بنیاد رکھی ہے۔

دوسری جانب اکشے کمار کے ساتھ اپنے تعلقات پر بات کرتے ہوئے ہمیش نے کہا کہ انہوں نے اکشے کے ساتھ کئی کامیاب فلموں میں کام کیا، جن میں ”کھلاڑی 786“ بھی شامل ہے۔

انہوں نے اکشے کے ساتھ کام کو یاد کرتے ہوئے کہا کہ ان کے ساتھ کام کرنے کا تجربہ بہت خوشگوار رہا، اور ان کی کئی فلموں نے باکس آفس پر زبردست کامیابی حاصل کی۔

واضح رہے کہ ہمیش ریشمیا نے حال ہی میں فلم ”بیڈ ایس روی کمار“ میں اداکاری کی، جو 7 فروری 2025 کو بھارتی سنیما گھروں میں ریلیز ہوئی۔ اس فلم میں ان کی پرفارمنس کو بھی سراہا گیا۔