ملک میں بارش اور برفباری کا سلسلہ وقفے وقفے سے جاری ہے، بارش کے باعث موسم خوشگوار اور سردی کی شدت میں اضافہ ہوگیا دوسری جانب ملک میں بارشوں کا دھواں دھاراسپیل کے دوران مختلف حادثات میں 9 افراد جاں بحق ہوگئے۔

راولپنڈی اور اسلام آباد میں وقفے وقفے سے بارش کا سلسلہ جاری ہے، بارش کے باعث موسم خوشگوار اور سردی کی شدت میں اضافہ ہوگیا۔

محکمہ موسمیات کے مطابق بارش کا سلسلہ آئندہ چند روز تک جاری رہے گا، خیبر پختونخوا میں آئندہ 24 گھنٹوں کے دوران مزید بارش اور پہاڑوں پر برف باری کا امکان ہے، گزشتہ روز سب سے زیادہ بارش کالام میں 22 ملی میٹر ریکارڈ کی گئی۔

محکمہ موسمیات کے مطابق آئندہ 24 گھنٹوں کے دوران پشاور، نوشہرہ ، مردان ، چارسدہ ، صوابی ،چترال ، دیر، سوات، شانگلہ، بونیر، مالاکنڈ ،ایبٹ اباد ، ہری پور، مانسہرہ ، بٹگرام ، کوہستان، تورغر،باجوڑ ۫، مہمند ، کوہاٹ ، ہنگو ، کرک ، لکی مروت، بنوں ، کرم، ڈی آئی خان ، ٹانک، شمالی و جنوبی وزیر ستان میں بارش اور بالائی اضلاع میں پہاڑوں پر برف باری کا امکان ہے۔

ملک میں بارش اور برفباری کا نیا سلسلہ داخل، این ڈی ایم اے نے ایڈوائزری جاری کردی

گزشتہ روز صوبے کے بیشتر اضلاع میں بارش اور مالم جبہ میں برف باری ہوئی، کالام میں 22 ، پارا چنار اور دیر میں 16 ملی میٹر بارش ہوئی، اس کے علاوہ مالم جبہ میں 12 اور پشاور میں 11 ملی میٹر بارش ریکارڈ کی گئی۔

پشاور کا کم سے کم درجہ حرارت 9 ڈگری سینٹی گریڈ ریکارڈ کیا گیا، شہر کا زیادہ سے زیادہ درجہ حرارت 19 ڈگری سینٹی گریڈ تک جانے کا امکان ہے جبکہ پارا چنار میں درجہ حرارت منفی 3 ،کالام میں منفی 1 ڈگری سینٹی گریڈ ریکارڈ ہوا۔

اس کے علاوہ شانگلہ اور مانسہرہ میں بارش اور پہاڑوں پر برف باری کا سلسلہ دوسرے روز بھی جاری ہے، وادی کاغان میں برفباری کے باعث سردی کی شدت میں اضافہ ہوگیا۔

دیربالا اور سوات میں بارش اوربرفباری سے سردی لوٹ آئی، مالم جبہ، کالام اور مہوڈنڈ میں برفباری سے ہرسو سفیدی چھاگئی۔ بلوچستان میں بھی خوب بارش برسی، چمن میں آندھی سےگھروں کی دیواریں اور بجلی کے ٹاورگرگئے۔

پنجاب کے شہروں شیخوپورہ، فاروق آباد، رینالہ خورد، کلورکوٹ، شرقپورشریف اوردیگرعلاقوں بارش سے جل تھل ایک ہوگیا۔

اپر اور لوئر چترال کے بیشترعلاقوں میں برفباری سے سردی کی شدت میں اضافہ

دوسری جانب چترال میں بارش اور برف باری کا سلسلہ گزشتہ روز سے جاری ہے، اپر اور لوئر چترال کے بیشترعلاقوں میں برفباری سے سردی کی شدت میں اضافہ ہوگیا، چترال شہر اور نواحی علاقوں میں بھی برف باری کا سلسلہ شروع ہوگیا، گرم چشمہ، شیشی کوہ، مدک لشٹ سمیت مختلف علاقوں میں برف باری جاری ہے۔

انتظامیہ کے مطابق لواری ٹنل پر اب تک 14 انچ تک برف پڑچکی ہے، چترال پشاور روڈ ہر قسم کی ٹریفک کے لیے کھلا ہے، اپر چترال میں بھی برف باری جاری ہے، متعدد دیہات نے برف کی سفید چادر اوڑھ لی۔

تورکہوروڈورکوپ ژوڑی دان کے مقام پر برفانی تودہ گرنے سے ٹریفک کے لیے بند ہوگئی، بونی میں اب تک 6 انچ تک برف پڑچکی ہے جبکہ اپر اور لوئر چترال کے کئی علاقوں میں رات سے بجلی غائب ہونے سے علاقہ مکینوں کو مشکلات کا سامنا ہے۔

ضلعی انتظامیہ نے مسافروں کو غیرضروری سفر سے گریز کرنے کی ہدایت کردی، ضلعی انتظامیہ نے ڈرائیورز کو دوران سفر سنو چین کے استعمال کی ہدایات دی گئی ہیں۔

بارش کے باعث مختلف حادثات میں 8 افراد جاں بحق

دوسری جانب بارش کے باعث مختلف حادثات میں 2 بچوں سمیت 9 افراد جاں بحق جبکہ خاتون اور متعدد زخمی ہوگئے۔

کرک میں مکان کی چھت گرنے سے 2 کمسن بہن بھائی جاں بحق ہوئے جبکہ خاتون اور 2 بچے زخمی ہوگئے۔ ایک اور واقعے میں وادی نیلم میں 3 افراد برفانی تودے تلے دب کرلقمہ اجل بن گئے۔

اٹک میں سڑک پر پھسلن سے بس کھائی میں جاگری جس کے باعث 3 افراد جان سے گئے جبکہ حادثے میں 9 زخمی ہوئے۔

گلیات میں برف باری کے بعد پھسلن کی وجہ سے گاڑیاں آپس میں ٹکرا گئیں۔ پشاور میں کوہاٹ روڈ پر مکان کی چھت تلے دب کر 4 بچے زخمی ہوگئے۔

جمرود کے علاقے ملا گوری میں بارش کے باعث کمرے کی چھت گرنے سے ایک خاتون جاں بحق ہوگئی، خاتون کی لاش کو ملبے تلے سے نکال کر اسپتال منتقل کر دیا گیا، خاتون دینی مدارس کی حافظ ومعلمہ تھی۔