پاکستان ٹیم کے سابق کپتان محمد حفیظ نے ناقص کارکردگی پر پاکستانی ٹیم کے تینوں فرنٹ لائن فاسٹ بولرز کو آڑے ہاتھوں لے لیا اور انہوں نے شاہین آفریدی، نسیم شاہ اور حارث رؤف کو فارغ کرنے کا مطالبہ کردیا۔

پاکستان کے سابق کپتان محمد حفیظ نے اتوار 23 فروری کو چیمپئنز ٹرافی کے دبئی میں کھیلے گئے میچ میں روایتی حریف بھارت کے خلاف پاکستان کی شکست کے بعد تینوں فاسٹ بولرز شاہین آفریدی، نسیم شاہ اور حارث رؤف کو تنقید کا نشانہ بنایا ہے۔

مقامی ٹی وی چینل پر تبصرہ کرتے ہوئے سابق کپتان محمد حفیظ نے مطالبہ کیا ہے کہ شاہین شاہ آفریدی، نسیم شاہ اور حارث رؤف کو ٹیم سے باہر نکال دینا چاہیئے۔

سابق کرکٹر کا کہنا تھا کہ تینوں فاسٹ بولرز نے ایشیا کپ 2023 کے بعد سے ناقص کارکردگی کا مظاہرہ کیا ہے، اس دوران تینوں کرکٹرز نے ون ڈے ورلڈکپ، ٹی20 ورلڈ کپ اور اب چیمپئنز ٹرافی جیسے میگا ایونٹس کھیلے ہیں۔

دبئی میں چیمپئنز ٹرافی؛ بھارت نے پاکستان کو 6 وکٹوں سے شکست دے دی، کوہلی کی سنچری

بھارت کیخلاف بابراعظم کا بلا خاموش، ناقص پرفارمنس نے شائقین کے دل توڑ دیے

بابر اعظم کے آئی سی سی ون ڈے ایونٹس میں 1000 رنز مکمل

انہوں نے کہا اب یہ تسلیم کرنے کا وقت ہے کہ ٹیلنٹ کے باوجود ان تینوں نے پاکستان کو بڑا ٹورنامنٹ نہیں جتوایا، اب وقت ہے کہ ہم آگے بڑھیں اور دوسرے بولرز جیسے محمد علی، خرم شہزاد، محمد وسیم جونیئر، عاکف جاوید اور میر حمزہ کو موقع دیں۔

محمد حفیظ نے کہا کہ نوجوان فاسٹ بولر اپنے مواقعوں کا انتظار کررہے ہیں، وہ بھی مستحق ہیں انکے پاس بھی پاکستانی پاسپورٹ ہے۔

بابراعظم سے متعلق بات کرتے ہوئے سابق کپتان نے کہا کہ بابر گزشتہ 10 سالوں سے پاکستان کے لیے کھیل رہے ہیں لیکن آج تک ایک میچ میں بھی بھارت کے خلاف قومی ٹیم کو فتح دلانے میں کامیاب نہیں ہوسکے۔

ان کا مزید کہنا تھا کہ بابر اعظم کو اب نمبر تین پر مستقل کھلانا چاہیئے تاکہ ٹیم کا مڈل آرڈر مضبوط ہو، رضوان، بابر اور سلمان علی آغا مل کے اچھا مڈل آرڈر بن سکتے ہیں۔