کیتھولک عیسائیوں کے مذہبی پیشوا پوپ فرانسس کی صحت مزید خراب ہوگئی جس کے بعد انہیں آکسیجن دی جانے لگی۔

خبر رساں اداروں کی رپورٹ کے مطابق 88 سالہ پوپ فرانسس کو ڈبل نمونیا کی تشخیص ہوئی تھی اور وہ 14 فروری سے اسپتال میں داخل ہیں۔

پوپ فرانسس کی صحت سے متعلق ویٹی کن نے اپنے حالیہ بیان میں بتایا ہے کہ پوپ فرانسس کی حالت نازک ہے اور انہیں آکسیجن دی جارہی ہے۔

پوپ فرانسس کی طبیعت ناساز ہوگئی ، اسپتال میں داخل

ویٹی کن سٹی کی جانب سے ایک بیان جاری کیا گیا کہ پوپ فرانسس کو سانس لینے میں کسی نئے مسئلے کا سامنا نہیں، پوپ ہوش میں ہیں اور ذہنی طور پر بہتر ہیں۔

ویٹی کن نے یہ بھی واضح کیا ہے کہ پوپ فرانسس اپنے عہدے سے دستبرار نہیں ہو رہے،اس بارے میں قیاس آرائیاں بے بنیاد ہیں۔

پوپ فرانسس کی اسرائیل پر دوبارہ کڑی تنقید، غزہ کی صورتحال کو شرمناک قرار دے دیا

ویٹی کن کے سینیئر عہدیدار کارڈینل پیرولین نے کہا کہ فکر مندی کی واحد بات پوپ کی صحت اور دوبارہ ویٹی کن واپسی ہے۔ پوپ سے مستعفی ہونے کے مطالبات بھی بے بنیاد ہیں۔

خیال رہے کہ پوپ فرانسس جو 2013 سے کیتھولک چرچ کے سربراہ ہیں، نے اسپتال میں رہتے ہوئے ایک پیغام جاری کیا تھا کہ مجھے اپنے علاج پر مکمل اعتماد ہے، اور میں آپ سب سے دعا کی درخواست کرتا ہوں۔