آئی سی سی چیمپئنز ٹرافی 2025 کے چوتھے میچ میں انگلینڈ نے آسٹریلیا کے خلاف میچ کے دوران متعدد عالمی ریکارڈز اپنے نام کرلیے تو دوسری طرف اوپننگ بلے باز بین ڈکٹ نے چیمپئنز ٹرافی میں انفرادی اننگز کا 21 سال پرانا ریکارڈ توڑ دیا۔

انگلینڈ نے آسٹریلیا کیخلاف کئی ریکارڈ اپنے نام کرلیے

آئی سی سی چیمپئنز ٹرافی 2025 کے چوتھے میچ میں انگلینڈ نے آسٹریلیا کے خلاف میچ کے دوران متعدد عالمی ریکارڈز اپنے نام کرلیے۔

لاہور کے قذافی اسٹیڈیم میں ہونے والے میچ میں انگلینڈ نے آسٹریلیا کے خلاف ٹاس جیت کر پہلے خود بیٹنگ کرنے کا فیصلہ کیا اور مقررہ 50 اوورز میں 8 وکٹوں کے نقصان پر 351 رنز بنائے۔

چیمپئنز ٹرافی کی تاریخ میں پہلی بار کسی بھی ٹیم نے 350 رنز کا ہندسہ عبور کیا ہے، یوں انگلینڈ نے اس آئی سی سی ٹورنامنٹ میں ایک نیا عالمی ریکارڈ قائم کردیا۔

اس سے پہلے، نیوزی لینڈ نے 2004 میں امریکا کی ٹیم کے خلاف 347 رنز بنائے تھے جبکہ پاکستان نے 2017 کے چیمپئنز ٹرافی کے فائنل میں بھارت کے خلاف 338 رنز بنائے تھے، چوتھے اور پانچویں نمبر پر یہ ریکارڈ بالترتیب بھارت اور انگلینڈ کے پاس ہے جنہوں نے جنوبی افریقا کے خلاف یہ ریکارڈ بنائے تھے۔

بین ڈکٹ نے چیمپئنز ٹرافی میں 21 سال پرانا ریکارڈ توڑ دیا

دوسری جانب آئی سی سی چیمپئنز ٹرافی 2025 کے چوتھے میچ میں انگلینڈ کے اوپنر بین ڈکٹ نے چیمپئنز ٹرافی میں انفرادی اننگز کا 21 سال پرانا ریکارڈ توڑ دیا۔

لاہور کے قذافی اسٹیڈیم میں انگلینڈ نے پہلےکھیلتے ہوئے بین ڈکٹ کے 165 رنز کی بدولت 351 رنز بنائے۔ بین ڈکٹ کی شاندار اننگز میں 3 چھکے اور 17 چوکے شامل تھے۔

اس اننگز کی بدولت اوپنر بین ڈکٹ نے چیمپئنز ٹرافی میں انفرادی اننگز کا 21 سال پرانا ریکارڈ توڑ دیا، بین ڈکٹ چیمپئنز ٹرافی میں سب سے بڑے انفرادی اننگزکھیلنے والے کھلاڑی بن گئے۔

اس سے قبل یہ ریکارڈ نیوزی لینڈ کے ناتھن آسٹل کے پاس تھا، نیتھن ایسٹل نے 2004 کی چیپئنز ٹرافی میں امریکا کی ٹیم کے خلاف 145 رنز بنائے تھے جبکہ زمبابوے کے اینڈی فلاور نے 2002 میں بھارت کے خلاف 145 رنز کی اننگز کھیلی تھی۔

چیمپئنز ٹرافی میں سب سے زیادہ رنز بنانے کی فہرست میں چوتھے نمبر پر سابق بھارتی کپتان سارو گنگولی ہیں، جنہوں نے 2000 میں جنوبی افریقا کے خلاف 141 رنز بنائے تھے جبکہ سچن ٹنڈولکر نے 1998 میں آسٹریلیا کے خلاف 141 رنز کی اننگز کھیلی تھی، جنوبی افریقا کے گریم اسمتھ 2009 میں انگلینڈ کے خلاف 141 رنز بناچکے ہیں۔