آئی سی سی چیمپئنز ٹرافی 2025 کے چوتھے میچ میں جوش انگلس کی شاندار سنچری کی بدولت آسٹریلیا نے انگلینڈ کو 5 وکٹوں سے شکست دے کر ایونٹ کا فاتحانہ آغاز کردیا جبکہ کینگروز نے 352 رنز کا ہدف 5 وکٹوں کے نقصان پر 48 ویں اوور میں حاصل کرکے نئی تاریخ رقم کردی۔

لاہور کے قذافی اسٹیڈیم میں کھیلے گئے چیمپیئنز ٹرافی کے گروپ بی کے دوسرے میچ میں انگلینڈ نے پہلے بیٹنگ کرتے ہوئے بین ڈکٹ کی 165 رنز کی شاندار اننگز کی بدولت مقررہ 50 اوورز میں چیمپئنز ٹرافی کی تاریخ کا سب سے بڑا اسکور 351 رنز بنایا۔

آسٹریلیا نے جوش انگلس کی شاندار سینچری کی بدولت 2 اوورز پہلے ہی 5 وکٹ کے نقصان پر مطلوبہ ہدف حاصل کرکے نئی تاریخ رقم کردی۔

بین ڈکٹ نے نہ صرف اپنی ٹیم کو اچھا ہدف فراہم کرنے میں مدد کی بلکہ انہوں نے چیمپئنز ٹرافی کی تاریخ کا سب سے بڑا اسکور بنانے کا ریکارڈ بھی اپنے نام کرلیا۔

اس سے پہلے یہ ریکارڈ نیوزی لینڈ کے سابق کھلاڑی نیتھن ایسٹل اور زمبابوے کے اینڈی فلاور کے پاس تھا جنہوں نے بالترتیب 2004 اور 2002 میں ، 145 145 رنز بناکر قائم کیا تھا۔

انگلینڈ کی بیٹنگ

لاہور کے قذافی اسٹیڈیم میں کھیلے جا رہے میچ میں آسٹریلیا نے ٹاس جیت کر پہلے فیلڈنگ کا فیصلہ کیا اور انگلینڈ کی ابتدائی 2 وکٹیں جلد حاصل کرنے میں کامیاب ہوگئے۔

انگلینڈ کی جانب سے بین ڈکٹ اور فل سالٹ نے اننگز کا آغاز کیا تاہم دوسرے ہی اوور میں ایلکس کیری کے شاندار کیچ نے فل سالٹ کو 10 رنز پویلین کی راہ دکھا دی جبکہ چھٹے اوور میں جیمی اسمتھ بھی 15 رنز بنا کر کیچ آؤٹ ہو گئے۔

43 رنز پر 2 وکٹیں گرنے کے بعد دوسرے اوپننگ بلے باز بین ڈکٹ اور جو روٹ نے ذمہ دارانہ بیٹنگ کرتے ہوئے اپنی ٹیم کا اسکور آگے بڑھایا اور 158 رنز کی اہم شراکت قائم کی، اس دوران دونوں کھلاڑیوں نے اپنی نصف سینچریاں مکمل کیں، جو روٹ 68 رنز بنانے کے بعد ایڈم زمپا کا شکار بنے۔

بین ڈکٹ نے نہ صرف ون ڈے کیریئر کی تیسری سینچری مکمل کی بلکہ انہوں نے 150 رنز کا ہندسہ بھی عبور کیا، وہ 165 رنز کی شاندار اننگز کھیلنے کے بعد آؤٹ ہوئے جس میں 3 چھکے اور 17 چوکے شامل تھے۔

اس کے علاوہ ہیری بروکس 3، کپتان جوز بٹلر 23 ، لیام لیونگ اسٹون 14 اور برائیڈن کارس 8 رنز بناکر آؤٹ ہوئے جبکہ جوفرا آرچر نے آخری لمحات میں 10 گیندوں پر 21 رنز کی جارحانہ اننگز کھیلی۔

اس طرح انگلینڈ کی ٹیم نے مقررہ 50 اوورز میں 8 وکٹوں کے نقصان پر 351 رنز بنائے اور آسٹریلیا کو جیت کے لیے 352 رنز کا ہدف دے دیا۔

آسٹریلیا کی بیٹنگ

352 رنز کے ہدف کے تعاقب میں آسٹریلیا کے جارح مزاج اوپنر ٹریوس ہیڈ صرف 6 رنز بنانے کے بعد جوفرا آرچر کے ہاتھوں آؤٹ ہوگئے جس کے بعد کپتان اسٹیو اسمتھ بیٹنگ کے لیے آئے لیکن وہ بھی 5 رنز کے مہمان ثابت ہوئے۔

ابتدائی دو وکٹیں جلد گرنے کے بعد بظاہر ایسا دکھائی دے رہا تھا کہ انگلینڈ یہ میچ آسانی سے جیت جائے گا لیکن میتھیو شارٹ نے مارنس لبوشین کے ساتھ ملکر 95 رنز کی شراکت قائم کی، لبوشین 47 رنز بنانے کے بعد آؤٹ ہوگئے۔

میتھیو شارٹ نے اپنی نصف سینچری مکمل کی اور وہ 63 رنز بنانے کے بعد پویلین واپس لوٹ گئے جس کے بعد جوش انگلس اور الیکس کیری نے ذمہ دارنہ اننگز کھیلتے ہوئے اسکور بورڈ کو آگے بڑھایا۔

الیکس کیری نصف سینچری بنانے کے بعد آؤٹ ہوئے، وہ 69 رنز کی اننگز کھیلنے میں کامیاب رہے تاہم آسٹریلیا کی جیت میں اہم کردار جوش انگلس نے ادا کیا جو 86 گیندوں پر 120 رنز بناکر ناقابل شکست رہے، ان کی اننگز میں 6 چھکے اور 8 چوکے شامل تھے۔

گلین میکسوئل نے 15 گیندوں پر 32 رنز کی اننگز کھیلی وہ بھی ناٹ آؤٹ رہے، انگلینڈکی جانب سے مارک ووڈ، جوفرا آرچر، برائیڈن کارس، عادل رشید اور لیام لیونگ اسٹون نے ایک ایک وکٹ حاصل کی۔

آسٹریلیا کی جانب سے بین دوارشوئس نے 3، ایڈم زمپا اور مارنس لبوشین نے 2،2 جبکہ گلین میکسوئل نے ایک وکٹ حاصل کی۔

میچ کا ٹاس

لاہور کے قذافی اسٹیڈیم میں کھیلے جا رہے چیمپئنز ٹرافی کے گروپ بی کے دوسرے میچ میں آسٹریلیا کے کپتان اسٹیو اسمتھ نے ٹاس جیت کر انگلینڈ کو بیٹنگ کی دعوت دی۔

آسٹریلیا کے کپتان اسٹیو اسمتھ کا کہنا تھا کہ پچ کافی اچھی لگ رہی ہے، پریکٹس کے دوران رات کے وقت یہاں اوس پڑ رہی تھی جس کی وجہ سے پہلے بیٹنگ کا فیصلہ کیا۔

انہوں نے کہا کہ آسٹریلیا کی پلیئنگ الیون میں ایلکس کارے کو شامل کیا گیا ہے۔

انگلینڈ کے کپتان جوز بٹلر کا کہنا تھا ہم ٹاس جیت جاتے تو بیٹنگ کو ہی ترجیح دیتے، کھلاڑی پُراعتماد ہیں، ہم اس میچ کے لیے پُرجوش ہیں۔

انگلینڈ کی ٹیم

انگلینڈ کے اسکواڈ میں فل سالٹ، بین ڈکٹ، جیمی اسمتھ، جوروٹ، ہیری بروک، جوز بٹلر، لیام لیونگسٹن، برائیڈن کارس، جوفرا آرچر، عادل رشید اور مارک ووڈ شامل ہیں۔

آسٹریلیا کی ٹیم

آسٹریلیا کے اسکواڈ میں کپتان اسٹیو اسمتھ، ٹریوس ہیڈ، میٹ شارٹ، مارنس لیبشگن، جوش انگلس، ایلکس کیری، گلین میکسویل، بین دوارشوئس، نیتھن ایلس، ایڈم زمپا اور اسپینسر جانسن شامل ہیں۔