گزشتہ روز گاڑی جلانے کے مقدمے میں رہائی کے بعد دوبارہ گرفتار کئے گئے مہاجر قومی موومنٹ کے چیئرمین آفاق احمد جوڈیشل مجسٹریٹ ویسٹ نثار احمد چانڈیو کی عدالت میں میں پیش کر دیا گیا۔

تفتیشی افسر نے عدالت سے آفاق احمد کے جسمانی ریمانڈ کی استدعا کی، تاہم عدالت نے انہیں عدالتی ریمانڈ پر جیل بھیج دیا اور آئندہ سماعت پر کیس کا چالان طلب کر لیا۔

عدالت میں پیشی کے دوران مہاجر قومی موومنٹ کے کارکنان نے لاک اپ کے باہر نعرے بازی کی اور ٹینکرز مافیا اور ڈمپر مافیا کے خلاف کارروائی کا مطالبہ کیا۔

آفاق احمد کو سرجانی میں نامعلوم افراد کے خلاف درج گاڑی جلانے کے مقدمے میں گرفتار کیا گیا تھا۔

انسداد دہشت گردی عدالت سے ضمانت حاصل کرنے کے بعد انہیں سرجانی پولیس نے دوبارہ گرفتار کر کے سٹی کورٹ منتقل کیا، جہاں انہیں جوڈیشل مجسٹریٹ ویسٹ کے روبرو پیش کیا گیا۔