وفاقی وزیر ڈاکٹر مصدق ملک نے کہا ہے کہ برطانیہ میں احتجاج کی کوشش بری طرح ناکام ہوئی ہے، سربراہان کی عزت سے ملک کی عزت بڑھتی ہے، پی ٹی آئی ایک بار پھر اداروں کے خلاف مہم چلانا چاہتی ہے، پی ٹی آئی کے خطوط مسلم لیگ ن کے خلاف نہیں پاکستان کے خلاف ہیں۔

آج ٹی وی کے پروگرام ’روبرو‘ کے میزبان شوکت پراچہ سے گفتگو کرتے ہوئے مصدق ملک نے کہاکہ ماضی میں آرمی چیف کے حوالے سے گفتگو پر پی ٹی آئی معافی مانگے، مذاکرات ہونے چاہیں، ملک بھر میں چھوٹے صوبے بنانے چاہیں۔

پاکستان تحریک انصاف کے چیف وہپ ملک عامر ڈوگر نے کہا ہے کہ لندن ہمیشہ سے ہی پاکستانی سیاست کا مرکز رہا ہے، 22 ماہ قبل رجیم چینج لندن پلان سے ہی ہوئی تھی، دو بڑی جماعتوں کا چارٹر آف ڈیمو کریسی بھی لندن میں ہوا تھا، میاں نوازشریف ہمیشہ فرار ہوکر لندن ہی جاتے ہیں۔

انہوں نے کہا کہ آرمی چیف کا سیاست سے کیا تعلق ہے؟ آپ انہیں زبردستی کیوں سیاست میں گھسیٹ رہے ہیں، ہر دور میں آرمی چیف کے خلاف بغض نکالا گیا، ہر آرمی چیف متاثرہ سیاسی جماعتوں کا نشانہ بنا، آج ہم متاثرین میں ہیں، پہلے دوسری سیاسی جماعتیں تھیں۔

عامر ڈوگر نے کہا ہے کہ امید ہے چیف جسٹس پاکستان اعلیٰ عدلیہ کا تشخص بحال کریںگے اور ہمارے ساتھ انصاف کریں گے، عدالتوں میں فیصلے لکھے ہوئے آتے ہیں۔

انہوں نے کہا کہ دنیا کے کئی ملک پنجاب سے چھوٹے ہیں، جنوبی پنجاب صوبے کے قیام کی تحریک عرصہ سے چل رہی ہے، ہم ابھی تک تخت لاہورکی قید میں ہیں، پنجاب کے11 اضلاع پر مشتمل بہترین صوبہ بن سکتا ہے۔

پیپلز پارٹی کے مرکزی رہنما ندیم افضل چن نے کہا ہے کہ بانی پی ٹی آئی کے خطوط پر ڈبیٹ ہونا چاہیے، خطوط پر سیاسی اور اداروں میں بات ہونا چاہیے، عمران خان خط سیاسی جماعتوں کو لکھتے تو زیادہ بہتر تھا، این آراو کوئی بھی کسی سے پوچھ کر نہیں دیتا۔

انہوں نے کہا کہ جنوبی پنجاب صوبہ بننا چاہیے، اشرافیہ کے سب کام ہو رہے ہیں، عام آدمی کے مسائل حل ہونے چاہیں، اصل جمہوریت کے لئے ساری جماعتوں کے مابین مذاکرات ہونے چاہیں۔