آئی سی سی چیمپئینز ٹرافی 2025 کے دوسرے میچ میں بھارت نے بنگلا دیش کو 6 وکٹوں سے شکست دے کر ٹورنامنٹ میں جیت کے ساتھ کھاتہ کھول لیا۔

دبئی میں کھیلے گئے میچ میں بنگلہ دیش نے بھارت کے خلاف مایوس کن آغاز کیا اور 35 رنز پر ان کی آدھی ٹیم پویلین لوٹ گئی تاہم توحید ہردوئی کی سینچری اور ذاکر علی کی نصف سینچری کی بدولت بنگال ٹائیگرز 228 رنز بنانے میں کامیاب رہی تاہم بھارت نے مطلوبہ ہدف 46.3 اوورز میں 4 وکٹوں کے نقصان پر حاصل کرلیا۔

بنگلہ دیش کی بیٹنگ

پاکستان کی میزبانی میں کھیلی جارہی چیمپئنز ٹرافی کے دوسرے میچ میں بنگلادیش نے بھارت کے خلاف ٹاس جیت کر پہلے بیٹنگ کا فیصلہ کیا، جر درست ثابت نہ ہوا۔

بنگلہ دیش نے اننگز کا آغاز کیا تو پہلے ہی اوور میں اس کا پہلا کھلاڑی آؤٹ ہوگیا، اوپنر سومیا سرکار کوئی رن بنائے بغیر بھارتی فاسٹ بولر محمد شامی کی گیند پر وکٹ کیپر کے ایل راہول کے ہاتھوں کیچ آؤٹ ہوگئے۔

اگلے اوور میں 2 رنز کے مجموعی اسکور پر کپتان نجم الحسن شانتو بھی کھاتہ کھولے بغیر پویلین لوٹ گئے، ہرشت رانا کی گیند پر ویرات کوہلی نے ان کا کیچ لیا۔

ساتویں اوور کی دوسری گیند پر مڈل آرڈر بلے باز مہدی حسن میراز بھی صرف 5 رنز بنانے کے بعد 26 کے مجموعی اسکور پر وکٹ گنوا بیٹھے، محمد شامی کی گیند پر شبمن گل نے ان کا کیچ تھاما۔

9 ویں اوور کی دوسری گیند پر اوپنر تنزید حسن 25 رنز بنانے کے بعد 35 رنز کے مجموعی اسکور پر اکشر پٹیل کی گیند پر وکٹ کیپر کے ایل راہول کو کیچ تھماکر آؤٹ ہوگئے اور اگلی ہی گیند پر وکٹ کیپر مشفق الرحیم کھاتہ کھولے بغیر کے ایل راہول کو کیچ تھما کر پویلین لوٹ گئے۔

35 رنز پر آدھی ٹیم پویلین لوٹ جانے کے بعد توحید ہردوئی اور ذاکر علی نے 154 رنز کی اہم شراکت قائم کی، اس دوران ذاکر علی نے اپنی نصف سینچری مکمل کی اور 189 کے مجموعی اسکور پر ذاکر علی 68 رنز بنانے کے بعد آؤٹ ہوگئے۔

توحید ہردوئی آخری اوور تک کریز پر ٹکے رہے، اس دوران انہیں فٹنس مسائل کا بھی سامنا کرنا پڑا اور وہ بیٹنگ کرتے ہوئے مشکل میں دکھائی دیے لیکن اس کے باوجود وہ ڈٹے رہے اور اپنی سینچری مکمل کی، وہ آخری اوور میں 100 رنز پر ہی آؤٹ ہوئے۔

اس طرح بنگلادیش کی ٹیم مقررہ 50 اوورز بھی نہ کھیلی سکی اور 49.4 اوورز میں 228 رنز بنا کر آؤٹ ہوگئی اور بھارت کو جیت کے لیے 229 رنز کا ہدف دے دیا۔

بھارت کی جانب سے محمد شامی نے 5 کھلاڑیوں کو پویلین کی راہ دکھائی جبکہ ہرشت رانا 3 اور اکشر پٹیل 2 وکٹیں حاصل کرنے میں کامیاب رہے۔

بھارت کی بیٹنگ

221 رنز کے ہدف کے تعاقب میں بھارت کی جانب سے کپتان روہت شرما اور شبمن گل نے ٹیم کو 69 رنز کا بہترین آغاز فراہم کیا، روہت شرما 41 رنز بنانے کے بعد تسکین احمد کا شکار بنے۔

ویرات کوہلی نے شبمن گل کے ساتھ اننگز کو آگے بڑھایا مگر 112 رنز کے مجموعی اسکور پر ویرات کوہلی بھی اپنی وکٹ گنوا بیٹھے، وہ 22 رنز بنانے میں کامیاب رہے جب کہ شریس ایئر کی اننگز 15 رنز تک ہی محدود رہی۔

بعد ازاں، وکٹ کیپر بلے باز کے ایل راہل بیٹنگ کے لیے آئے اور وہ آخر تک کریز پر موجود رہے، اس دوران شبمن گل نے اپنی سینچری بھی مکمل کی، وہ 101 رنز پر ناقابل شکست رہے جبکہ کے ایل راہل نے 41 رنز بناکر ان کا بھرپور ساتھ دیا۔

اس طرح بھارت نے 229 رنز کا ہدف 47 ویں اوور میں پورا کرلیا اور جیت کے ساتھ ٹورنامنٹ میں اپنا کھاتہ کھول لیا۔

بنگلہ دیش کی جانب سے رشاد حسین نے 2، تسکین احمد اور مستفیض الرحمان نے ایک ایک وکٹ حاصل کی۔

میچ کا ٹاس

دبئی میں کھیلے جارہے چیمپئنز ٹرافی کے دوسرے میچ میں بنگلادیش کے کپتان نجم الحسن شانتو نے بھارت کے خلاف ٹاس جیت کر پہلے بیٹنگ کا فیصلہ کیا۔

بنگلادیشی کپتان کا کہنا ہے کہ آج کے میچ کے لیے تمام کھلاڑی پرجوش ہیں اور وہ 3 فاسٹ بولرز اور 2 اسپنرز کے ساتھ میدان میں اتر رہے ہیں، وکٹ بہت اچھی لگ رہی ہے، ہم اسکور بورڈ پر بڑا مجموعہ ترتیب دینے کی کوشش کریں گے، ہماری تیاریاں بہت اچھی ہیں، بی پی ایل کھیلنے کے بعد ہمارے کھلاڑی چیمپئنز ٹرافی کے لیے تیار ہیں۔

بھارت کے خلاف تیاریوں سے متعلق سوال پر انہوں نے کہا کہ ہم نے بھارت کے خلاف آخری سیریز جیتی تھی، ہم آج اچھی کرکٹ کھیلیں گے، مجھے امید ہے کہ کھلاڑی پورے اعتماد سے خود پر یقین کریں گے۔

بھارتی کرکٹ ٹیم کے کپتان روہت شرما نے کہا کہ دبئی میں فلڈ لائٹس میں بیٹنگ کرنا آسان ہوتا ہے، ہم ٹاس جیتتے تو فیلڈنگ ہی کرتے، اب ہم باؤلنگ پر توجہ دیں گے اور دیکھتے ہیں کھیل کس طرف جاتا ہے۔

انہوں نے کہا کہ آئی سی سی کے ٹورنامنٹ کا ہر میچ اہم ہوتا ہے، مڑکر دیکھنے کی گنجائش ہوتی اور تمام ٹیمیں ایسا ہی سوچتی ہیں، انہوں نے بتایا کہ ٹیم میں دو تبدیلیاں کی گئی ہیں، ورون دھون کی جگہ روندر جدیجہ اور ہرشدیپ کی جگہ محمد شامی کو ٹیم میں شامل کیا گیا ہے۔

بھارتی ٹیم

بھارتی ٹیم کپتان روہت شرما، شبمن گل، ویرات کوہلی، شریاس ائیر، اکشر پٹیل، کے ایل راہول، ہاردک پانڈیا، رویندرا جدیجہ، ہرشت رانا، محمد شامی اور کلدیپ یادیو پر مشتمل ہے۔

بنگلہ دیشی ٹیم

بنگلہ دیش کی ٹیم کپتان نجم الحسن شانتو، تنزید حسن، سومیا سرکار، توحید ہردوئی، مشفق الرحیم، مہدی حسن میراز، ذاکر علی، تنظیم حسن ثاقب، تسکین احمد اور مستفیض الرحمٰن پر مشتمل ہے۔

خیال رہے کہ آئی سی سی چیمپئنز ٹرافی کا نواں ایڈیشن پاکستان میں شروع ہوچکا ہے، جس میں پاکستان کو پہلے میچ میں شکست کا منہ دیکھنا پڑا، اب مزید ایک میچ کا فیصلہ آج ہوگا جس میں بنگلہ دیش اور بھارت کی ٹیمیں دبئی انٹرنیشنل کرکٹ سٹیڈیم میں مد مقابل ہیں۔

آئی سی سی چیمپئنز ٹرافی میں 8 ٹیمیں ٹائٹل کے حصول کے لئے کوشاں ہیں، جن میں میزبان دفاعی چیمپئن پاکستان، بنگلہ دیش، افغانستان، بھارت، نیوزی لینڈ، انگلینڈ، آسٹریلیا اور جنوبی افریقا شامل ہیں۔

تمام آٹھ ٹیموں کو دو گروپس میں تقسیم کیا گیا ہے۔ گروپ اے میں دفاعی چیمپئن پاکستان، بنگلہ دیش، بھارت اور نیوزی لینڈ کی ٹیمیں شامل ہیں، جبکہ گروپ بی میں افغانستان، آسٹریلیا، انگلینڈ اور جنوبی افریقا کی ٹیموں کو رکھا گیا ہے۔

تمام آٹھ ٹیموں کے دو گروپس میں سے دو، دو ٹاپ ٹیمیں سیمی فائنل راؤنڈ کے لئے کوالیفائی کریں گی۔

آئی سی سی چیمپئنز ٹرافی کا پہلا میچ گروپ اے کی ٹیموں دفاعی چیمپئن پاکستان اور نیوزی لینڈ کے درمیان نیشنل کرکٹ سٹیڈیم کراچی میں کھیلا گیا۔

چیمپئنز ٹرافی کا پہلا سیمی فائنل میچ 4 مارچ جبکہ دوسرا سیمی فائنل میچ 5 مارچ کو کھیلا جائے گا۔ دو فائنلسٹ ٹیموں کے درمیان آئی سی سی چیمپئنز ٹرافی کا فائنل میچ 9 مارچ کو کھیلا جائے گا۔