کراچی کے علاقے کلفٹن میں ایک ایسا فلاحی دسترخوان لگایا جاتا ہے جہاں خواتین اور بچوں کو دو وقت کا کھانا مفت فراہم کیا جاتا ہے۔ متوسط اور بے گھر خواتین کا کہنا ہے کہ موجودہ مہنگائی کے دور میں یہ دسترخوان کسی نعمت سے کم نہیں۔

یہ منفرد دسترخوان نہ صرف خواتین کے لیے مخصوص ہے بلکہ یہاں کھانے کی تقسیم اور انتظام بھی خواتین ہی سنبھالتی ہیں۔ صاف ستھری میزیں، کرسیاں اور گھر کے پکے ہوئے لذیذ پکوان اس دسترخوان کی خاص بات ہیں۔

فٹ پاتھ پر لگے اس فلاحی مرکز میں روزانہ دو سے تین سو خواتین اور بچے پیٹ بھر کر کھانا کھاتے ہیں۔

منتظمین کا کہنا ہے کہ یہاں کسی بھی رنگ و نسل کی تفریق کے بغیر ہر ضرورت مند خاتون کو کھانے کی سہولت دی جاتی ہے۔

یہ دسترخوان خواتین کے لیے امید کی ایک کرن ہے، جہاں انہیں عزت اور احترام کے ساتھ کھانا فراہم کیا جاتا ہے، اور یہی چیز اسے ایک منفرد اور قابل تقلید مثال بناتی ہے۔