خیبرپختونخوا میں سیکیورٹی فورسز نے 2 الگ الگ کارروائیوں کے دوران 15 خوارج دہشت گردوں کو ہلاک کردیا جبکہ شدید فائرنگ کے تبادلے میں لیفٹیننٹ محمد حسان اشرف کے سمیت 4 جوان بہاردری سے لڑتے ہوئے شہید ہوگئے۔

پاک فوج کے شعبہ تعلقات عامہ (آئی ایس پی آر) سیکیورٹی فورسز نے خیبرپختونخوا میں 2 مختلف مقامات پر کارروائیاں کی، سیکیورٹی فورسز نے ضلع ڈیرہ اسماعیل خان کے علاقے ہتھالہ میں انٹیلی جنس کی بنیاد پر آپریشن کیا، جہاں خوارج کی موجودگی کی اطلاع ملی تھی۔

آئی ایس پی آر کے مطابق دورانِ آپریشن سیکیورٹی فورسز نے خوارج کے ٹھکانے کو مؤثر انداز میں نشانہ بنایا، جس کے نتیجے میں 9 خوارج مارے گئے۔

آئی ایس پی آر کا کہنا ہے کہ ہلاک ہونے والوں میں خارجی رِنگ لیڈر فارمان عرف ثاقب، خارجی امان اللہ عرف توری، خارجی سعید عرف لیاقت خارجی بلال شامل ہیں، یہ تمام دہشت گرد علاقے میں متعدد تخریبی سرگرمیوں میں ملوث اور قانون نافذ کرنے والے اداروں کو مطلوب تھے۔

سیکیورٹی فورسز کی خیبر پختونخوا میں 5 مختلف کارروائیوں میں 13 خوارج ہلاک

ترجمان پاک فوج کے مطابق سیکیورٹی فورسز نے دوسری کارروائی شمالی وزیرستان کے علاقے میرانشاہ میں کی، کارروائی کے دوران 6 خوارج جہنم واصل کردیے گئے۔

آئی ایس پی آر کے مطابق خوارج سے فائرنگ کے شدید تبادلے میں پاک فوج کے لیفٹیننٹ محمد حسان اشرف سمیت 4 جوان شہید ہوگئے، شہدا میں نائب صوبیدار محمد بلال، سپاہی فرحت اللہ اور سپاہی ہمت خان شامل ہیں۔

ترجمان کا کہنا ہے کہ سیکیورٹی فورسز کا ممکنہ خارجیوں کے خاتمے کے لیے کلیئرنس آپریشنز جاری ہے، سیکیورٹی فورسز دہشت گردی کے خاتمے کے لیے پرعزم ہیں، بہادر جوانوں کی قربانیاں ہمارے عزم کو مزیدت قویت دیتی ہیں۔

خیال رہے کہ 2 روز قبل سیکیورٹی فورسز نے خیبرپختونخوا کے علاقوں میں 5 مختلف کارروائیوں کے دوران 13 خارجی دہشت گردوں کو ہلاک کیا تھا۔

سیکیورٹی فورسز کی جانب سے ڈیرہ اسماعیل خان، وزیرستان، لکی مروت اور خیبر کے علاقوں میں آپریشن کیے گئے، دہشت گردوں کی موجودگی کی خفیہ اطلاع پر کارروائیاں کی گئی تھیں۔

پاک فوج کے لیفٹیننٹ محمد حسان اشرف شہید کی نماز جنازہ میں ادا

شمالی وزیرستان کے علاقے میران شاہ میں مادر وطن کا دفاع کرتے ہوئے بہادری سے جام شہادت نوش کرنے والے پاک فوج کے 21 سالہ لیفٹیننٹ محمد حسان اشرف شہید کی نماز جنازہ لاہور گیریژن میں ادا کر دی گئی۔

آئی ایس پی آر کے مطابق وزیر اعظم میاں محمد شہباز شریف، وزیر دفاع خواجہ آصف، وزیر اطلاعات عطا تارڑ، اعلیٰ فوجی اور سول حکام سمیت شہید کے لواحقین نے جنازے میں شرکت کی۔

اس موقع پر وزیر اعظم میاں محمد شہباز شریف نے کہا کہ یہ عظیم قربانی ہمارے بہادر سپوتوں کے غیر متزلزل عزم اور بہادری کی ایک منہ بولتی مثال ہے، جنہوں نے وطن عزیز کی خود مختاری اور دفاع کے لیے اپنی جانوں کا نذرانہ پیش کیا، پوری قوم ہماری مسلح افواج کے ساتھ مکمل یکجہتی کا اظہار کرتے ہوئے متحد ہے، لیفٹیننٹ محمد حسان اشرف شہید کو پورے فوجی اعزاز کے ساتھ سپرد خاک کیا جائے گا۔

دہشت گردوں کے ناپاک عزائم کو کبھی کامیاب نہیں ہونے دیں گے، وزیراعظم

دوسری جانب وزیرِاعظم شہباز شریف نے خیبرپختونخوا میں خوارج کے خلاف کامیاب آپریشن پر سیکیورٹی فورسز کی پزیرائی کی اور سیکیورٹی فورسز کے افسران اور اہلکاروں کی پیشہ ورانہ صلاحیتوں کی تعریف کی ہے۔

وزیرِاعظم نے شہید لیفٹیننٹ محمد حسان اشرف اور 3 سپاہیوں کو خراج عقیدت پیش کیا اور شہدا کی بلندی درجات اور ان کے اہل خانہ کے لیے صبر کی دعا کی۔

خیبر کے علاقے باغ میں سکیورٹی فورسز کا آپریشن، 4 خوارج ہلاک

شہباز شریف نے کہا کہ مجھ سمیت پوری قوم کو اپنے شہدا اور ان کے اہل خانہ پر فخر ہے، دہشت گردی کے ملک سے مکمل خاتمے تک اس کے خلاف جنگ جاری رکھیں گے۔

انہوں نے مزید کہا کہ افواج پاکستان ٓجان کی پرواہ کئے بغیر وطن کی حفاظت کے لیے دن رات مصروف عمل ہیں، پاکستانی قوم اپنی بہادر افواج کے غیر متزلزل عزم پر انہیں سلام پیش کرتی ہے۔

دہشتگردوں کے مکمل خاتمے تک سیکیورٹی فورسز کی کاروائیاں جاری رہیں گی، صدر

ادھر صدر مملکت آصف علی زرداری نے خیبر پختونخوا میں کامیاب آپریسن پر سیکیورٹی فورسز کو خراج تحسین پیش کیا اور دہشت گردوں کا قلع قمع کرنے پر سیکیورٹی فورسز کی بہادری کو سراہا۔

صدر مملکت نے شہید لیفٹننٹ محمد حسان اشرف سمیت 4 جوانوں کو خراجِ عقیدت پیش کیا اور پاک فوج کے بہادر شہدا کی بہادری اور جذبہ حب الوطنی کو سراہا۔

آصف زرداری نے شہدا کے لواحقین کے ساتھ اظہار ہمدردی اور صبر جمیل کی دعا کی اور کہا کہ قوم اپنے بہادر شہدا کی قربانیوں کو ہمیشہ یاد رکھے گی۔

انہوں نے مزید کہا کہ دہشت گردوں کے مکمل خاتمے تک سیکیورٹی فورسز کی کاروائیاں جاری رہیں گی، دہشت گرد عناصر کے خاتمے، ملکی دفاع کیلئے ہمارا عزم غیر متزلزل رہے گا۔

صدر مملکت آصف علی زرداری نے فتنۃ الخوارج کے مکمل خاتمے کے قومی عزم کا اظہار کیا۔

قوم شہدا کی قربانیوں کی ہمیشہ مقروض رہے گی، وزیر داخلہ

وفاقی وزیر داخلہ محسن نقوی نے خیبرپختونخوا میں کامیاب آپریشن پر سیکیورٹی فورسز کو خراج تحسین پیش کیا جبکہ انہوں نے شہید لیفٹیننٹ محمد حسان اشرف سمیت 4 جوانوں کو زبردست الفاظ میں خراج عقیدت پیش کیا ہے۔

محسن نقوی نے کہا کہ شہدا نے جان دے کر خوارجی دہشت گردوں کے مذموم عزائم کو ناکام بنایا، شہدا کی عظیم قربانیوں کو ہمیشہ یاد رکھا جائے گا، قوم شہدا کی قربانیوں کی ہمیشہ مقروض رہے گی۔

وزیر داخلہ کا مزید کہنا تھا کہ قوم کو سیکیورٹی فورسز کی پیشہ وارانہ صلاحیتوں اورجرات پر فخر ہے، خیبرپختونخوا میں قیام امن کے لیے سیکیورٹی فورسز کے اقدامات قابل تعریف ہیں، قوم خوارجی دہشت گردوں کے خاتمے کے لیے سیکیورٹی فورسز کے شانہ بشانہ کھڑے ہیں۔