سندھ کے سینئر وزیر شرجیل انعام میمن کا کہنا ہے کہ غیر رجسٹرڈ گاڑیوں کو فوری طور پر ضبط کر لیا جائے گا اور اگر کوئی بغیر لائسنس کے گاڑی چلاتا ہوا پایا گیا تو اسے گرفتار کر لیا جائے گا۔

شرجیل میمن نے ہفتے کو پریس کانفرنس کرتے ہوئے کہا کہ انفلوئنزا کی بیماری پاکستان سمیت دنیا بھر میں پھیل رہی ہے، اس سے بچاؤ کے لیے عوام کو احتیاطی تدابیر اختیار کرنی چاہئیں۔ انہوں نے کہا کہ جس طرح کورونا وبا کے دوران سماجی فاصلہ رکھا جاتا تھا، اسی طرح اب بھی شہریوں کو ایک دوسرے سے فاصلہ رکھنا چاہیے اور ماسک پہننے کی عادت اپنانی چاہیے۔

صوبائی وزیر نے واضح کیا کہ کسی بھی حادثے یا فائرنگ کے واقعات میں زخمی ہونے والے افراد سندھ کے کسی بھی اسپتال میں جا سکتے ہیں اور ان کے علاج معالجے کے اخراجات سندھ حکومت برداشت کرے گی۔

شرجیل میمن نے مزید کہا کہ صوبائی کابینہ نے گورنر سندھ کے تمام اعتراضات کو غور سے پڑھا ہے اور پیر سے اسلحے کی نمائش کرنے والوں کے خلاف سخت کارروائی کی جائے گی، جبکہ غیر رجسٹرڈ گاڑیوں کو فوری طور پر ضبط کر لیا جائے گا۔ انہوں نے واضح کیا کہ صرف رجسٹرڈ گاڑیوں کو شوروم سے باہر نکالنے کی اجازت ہوگی اور اسلحہ کی نمائش پر مکمل پابندی عائد رہے گی۔

انہوں نے کہا کہ گاڑیوں کے فٹنس سرٹیفکیٹ بھی لازمی ہوں گے اور ٹرانسپورٹرز سے اس حوالے سے میٹنگ بھی کی جا چکی ہے۔ ان کا کہنا تھا کہ اگر کوئی بغیر لائسنس کے گاڑی چلاتا ہوا پایا گیا تو اسے گرفتار کر لیا جائے گا۔

سینئر وزیر نے والدین سے اپیل کی کہ وہ کم عمر بچوں کو گاڑیاں چلانے کی اجازت نہ دیں، کیونکہ اس سے حادثات میں اضافہ ہو سکتا ہے۔ انہوں نے کہا کہ سندھ حکومت ٹریفک قوانین پر سختی سے عملدرآمد کرائے گی اور عوام کی حفاظت کے لیے تمام ممکنہ اقدامات اٹھائے جا رہے ہیں۔