ہوائی سفر میں لمبے دورانیے کے دوران آرام دہ نیند حاصل کرنا اکثر مسافروں کے لیے ایک مشکل کام ہوتا ہے، خاص طور پر جب اکانومی کلاس کی نشستیں محدود جگہ فراہم کرتی ہیں۔ اسی مشکل کو حل کرنے کے لیے لوگ مختلف طریقے اپناتے ہیں، جیسے مہنگے نیک یا گردن کے تکیے خریدنا یا عجیب و غریب پوزیشنز میں سونے کی کوشش کرنا۔

لیکن حالیہ دنوں میں ایک نیا ’ٹِک ٹاک ہیک‘ وائرل ہو رہا ہے، جس میں مسافر اپنے گھٹنوں کو سینے سے لگا کر اپنے پیروں کو نشست کے کنارے پر رکھتے ہیں اور سیٹ بیلٹ کو اپنے ٹخنوں کے گرد لپیٹ کر سونے کی کوشش کرتے ہیں تاکہ ان کے پاؤں اپنی جگہ پر جمے رہیں۔ اس طریقے کو لاکھوں لوگ دیکھ چکے ہیں، لیکن ماہرین اسے نہایت خطرناک قرار دے رہے ہیں۔

ماہرین کی وارننگ کہ یہ ہیک انتہائی خطرناک ہے

امریکہ میں فلائٹ اٹینڈنٹس کی نمائندہ تنظیم ’ایسوسی ایشن آف فلائٹ اٹینڈنٹس- سی ڈبلیو اے‘ کی صدر سارہ نیلسن نے اس طریقے پر سخت تنقید کرتے ہوئے کہا،

ہفتے میں 5 دن ہوائی جہاز سے دفتر جانے والی خاتون کون؟

’یہ انتہائی خطرناک ہے۔ سیٹ بیلٹ کو کمر کے گرد سختی سے باندھنا ضروری ہوتا ہے تاکہ کسی ہنگامی صورتحال میں مسافر محفوظ رہ سکیں۔ اگر آپ غلط طریقے سے بیلٹ باندھیں گے تو آپ خود کو اور دوسروں کو نقصان پہنچا سکتے ہیں، خاص طور پر جب پرواز کے دوران اچانک جھٹکے لگیں۔‘

مزید برآں، سارہ نیلسن کے مطابق یہ طریقہ نہ صرف غیر محفوظ بلکہ قوانین کی بھی خلاف ورزی ہے۔

’یہ ہوائی سفر کے ضوابط کے خلاف ہے، اور اگر کوئی جان بوجھ کر اس ہیک کو آزماتا ہے تو اسے 35 ہزار ڈالر تک جرمانے کا سامنا کرنا پڑ سکتا ہے۔‘

ہارورڈ میڈیکل اسکول کے پروفیسر اور خون کی بیماریوں کے ماہر ڈاکٹر ناتھن کونل نے بھی اس طریقے کے نقصانات کی نشاندہی کی۔ ان کے مطابق اس طریقے سے ٹخنوں اور ٹانگوں کے گرد خون کی گردش متاثر ہو سکتی ہے، جو خون کے لوتھڑے (ڈیپ وین تھرومبوسس۔ DVT) بننے کا سبب بن سکتی ہے۔

فضا میں فلمی ہنگامہ: شیو سینا لیڈر کے بیٹے کا پرائیویٹ جہاز پولیس نے اتار لیا

’اگر کوئی شخص کئی گھنٹوں تک اس پوزیشن میں رہے اور خون کی روانی محدود ہو جائے تو اس سے ڈی وی ٹی یا پلمونری ایمبولزم (پھیپھڑوں میں خون کے لوتھڑے) کا خطرہ بڑھ سکتا ہے۔‘

ڈاکٹر ناتھن کا مشورہ ہے کہ لمبے سفر کے دوران خون کی روانی کو بہتر بنانے کے لیے مسافروں کو چاہیے کہ وہ ان باتوں پر عمل کریں،

زیادہ پانی پئیں، ڈھیلے اور آرام دہ کپڑے پہنیں، وقتاً فوقتاً اٹھ کر چہل قدمی کریں۔

سوشل میڈیا پر اس وائرل ہیک پر ملے جلے ردعمل سامنے آ رہے ہیں۔ کچھ لوگ اسے آزمانے کا ارادہ رکھتے ہیں، جبکہ کچھ اسے غیر ضروری اور غیر آرام دہ سمجھتے ہیں۔ کچھ صارفین نے اسے اکانومی کلاس کے تنگ اور غیر آرام دہ سیٹوں کا نتیجہ قرار دیا، جبکہ دیگر افراد نے اس طریقے کو خطرناک قرار دیتے ہوئے خبردار کیا کہ یہ شدید چوٹوں کا سبب بن سکتا ہے، خاص طور پر اگر پرواز کے دوران تیز جھٹکے لگیں۔

ہوائی جہاز کی سب سے آرام دہ سیٹ جس کا فائدہ کم ہی لوگ جانتے ہیں

کسی بھی ہوائی سفر کے دوران آرام دہ نیند لینا ایک مشکل کام ہو سکتا ہے، لیکن ایسی تکنیکوں کو آزمانا جو حفاظتی اصولوں کے خلاف ہوں اور خطرناک نتائج پیدا کر سکتی ہوں، دانشمندی نہیں۔ فلائٹ کے دوران اپنی اور دوسروں کی سلامتی کا خیال رکھنا سب سے اہم ہے۔ لہٰذا، اس وائرل ٹِک ٹاک ہیک کو نظر انداز کریں اور ماہرین کی تجاویز پر عمل کریں تاکہ آپ کا سفر محفوظ اور خوشگوار گزرے۔