ایف آئی اے کورٹ کے باہر اے ایس آئی محمد شاہد پر تشدد کرنے والے ملزمان کو اسلام آباد سے گرفتار کر لیا گیا۔

گزشتہ روز انوسٹی گیشن ونگ کی ٹیم مزنگ میں ایک اشتہاری ملزم کی گرفتاری کے لیے گئی تھی، جہاں ملزم نے ساتھیوں کے ہمراہ پولیس ٹیم پر حملہ کر دیا اور اے ایس آئی شاہد پر شدید تشدد کیا، جس کے نتیجے میں وہ جان کی بازی ہار گیا۔

واقعے کے بعد ملزمان موقع سے فرار ہو گئے اور روپوش ہو گئے تھے۔ ان کی گرفتاری کے لیے خصوصی ٹیم تشکیل دی گئی، جس کی نگرانی ڈی آئی جی آپریشنز نے خود کی۔ پولیس نے انٹیلیجنس اور جدید ٹیکنالوجی کی مدد سے چوبیس گھنٹوں کے اندر ملزمان کو بنی گالہ اسلام آباد سے گرفتار کر لیا۔

گرفتار ملزمان کو مزید کارروائی کے لیے انویسٹیگیشن ونگ کے حوالے کر دیا گیا ہے۔

پولیس حکام کا کہنا ہے کہ محکمہ پولیس کے جوان اپنی جان ہتھیلی پر رکھ کر قوم کی خدمت کرتے ہیں اور فرض کی راہ میں جان دینے والے افسران اور اہلکار ہمارا قیمتی اثاثہ ہیں۔