لاہور میں شادباغ انویسٹی گیشن پولیس کے اے ایس آئی شاہد اور کانسٹیبل جمیل وکلا گردی کا نشانہ بن گئے۔ اشتہاری ملزم کی گرفتاری کے لیے مزنگ میں چھاپے کے دوران وکلا نے پولیس ٹیم پر حملہ کر دیا، جس کے نتیجے میں اے ایس آئی شاہد جان کی بازی ہار گئے۔

پولیس ذرائع کے مطابق پولیس اہلکاروں نے چیک ڈس آنر کیس میں مطلوب اشتہاری ملزم کی گرفتاری کے لیے کارروائی کی تھی، تاہم گرفتاری کے دوران وکلا نے اپنے ساتھیوں کے ہمراہ حملہ کر دیا۔ وکلا کے شدید تشدد سے اے ایس آئی شاہد موقع پر ہی بے ہوش ہوگئے اور اسپتال پہنچنے سے پہلے ہی دم توڑ گئے۔

پولیس نے واقعے کے تمام شواہد اکٹھے کر کے ملزمان کی تلاش شروع کر دی ہے، جبکہ آئی جی پنجاب ڈاکٹر عثمان انور نے واقعہ کا نوٹس لیتے ہوئے سی سی پی او لاہور سے رپورٹ طلب کر لی ہے۔

آئی جی پنجاب نے ڈی آئی جی آپریشنز کو ہدایت دی ہے کہ تشدد میں ملوث تمام ملزمان کو فوری گرفتار کرکے سخت قانونی کارروائی عمل میں لائی جائے۔