نائب وزیر اعظم اسحاق ڈار اور ایرانی وزیر خارجہ سید عباس عراقچی کے درمیان ٹیلی فونک رابطہ ہوا ہے، جس میں مشرق وسطیٰ کی صورتحال، بالخصوص غزہ میں فلسطینی عوام کی حالت زار پر تفصیلی گفتگو کی گئی۔

ترجمان دفتر خارجہ شفقت علی خان کے مطابق نائب وزیر اعظم اسحاق ڈار نے غزہ کے شہریوں کو بے گھر کرنے کی تجویز کو غیر منصفانہ اور انتہائی پریشان کن قرار دیا۔ ان کا کہنا تھا کہ فلسطینی سرزمین فلسطینی عوام کی ہے، اور اس مسئلے کا واحد قابلِ عمل اور منصفانہ حل اقوام متحدہ کی سلامتی کونسل کی قراردادوں کے مطابق دو ریاستی حل ہے۔

ترجمان دفتر خارجہ نے مزید کہا کہ پاکستان 1967 سے پہلے کی سرحدوں پر مبنی ایک خودمختار اور متصل فلسطینی ریاست کے قیام کی حمایت جاری رکھے گا، جس کا دارالحکومت القدس الشریف ہوگا۔

اس موقع پر نائب وزیر اعظم نے او آئی سی وزرائے خارجہ کا غیر معمولی اجلاس بلانے کے لیے پاکستان کی حمایت سے بھی آگاہ کیا۔ فریقین نے اس معاملے پر قریبی رابطہ برقرار رکھنے پر اتفاق کیا۔