لاہور کے تھانہ قائداعظم انڈسٹریل اسٹیٹ کی حدود میں ہونے والی ڈکیتی کی واردات کا ڈراپ سین ہو گیا، پولیس نے مقدمے کے مدعی کو گرفتار کرلیا۔

ترجمان پولیس کے مطابق نجی کمپنی کے کیشیئر نے اپنے ساتھیوں کے ساتھ مل کر مالک کے 11 لاکھ روپے ہڑپ کرنے کی کوشش کی، جسے پولیس نے بروقت کارروائی کرکے ناکام بنا دیا۔

ایس ایچ او قائداعظم انڈسٹریل اسٹیٹ کی سربراہی میں پولیس ٹیم نے 48 گھنٹوں میں انٹیلیجنس بیسڈ کارروائی کرتے ہوئے واردات میں ملوث تین افراد کو گرفتار کیا۔

ایس پی صدر ڈاکٹر غیور احمد خان کے مطابق ملزمان کے قبضے سے 11 لاکھ روپے، پستول اور درجنوں گولیاں برآمد کر لی گئی ہیں۔

پولیس کے مطابق ملزمان زبیر اور اس کے ساتھیوں کے خلاف مقدمات درج کرکے مزید تفتیش کے لیے انویسٹی گیشن ونگ کے سپرد کر دیا گیا ہے۔

ایس پی صدر کا کہنا تھا کہ اسٹریٹ کرائمز کی روک تھام پولیس کی اولین ترجیح ہے اور مجرموں کے خلاف کارروائیاں جاری رہیں گی۔