کراچی میں ڈمپر اور ٹینکر کے حادثات میں اضافے پر اظہار تشویش کرتے ہوئے گورنر سندھ نے چیف جسٹس سندھ ہائی کورٹ اور آئی جی سندھ کو خط لکھ دیا۔

ذرائع کے مطابق گورنر سندھ کامران ٹیسوری نے سندھ ہائی کورٹ کے چیف جسٹس اور آئی جی سندھ کو اپنے خط میں کہا کہ عوام ڈمپر، ٹینکرز کیخلاف فیصلہ کن کارروائی کے لیے عدالت کی طرف دیکھ رہے ہیں، مجھے یقین ہے کہ معزز ہائی کورٹ اس اہم مسئلے کا فوری نوٹس لے گی۔

گورنر سندھ کا خط میں کہنا ہے کہ ڈرائیور حادثات کے بعد موقع سے فرار ہو جاتے ہیں جو قانون کے نفاذ اور احتساب پر سنگین سوالات اٹھاتے ہیں۔

خط میں کہا گیا کہ سندھ ہائی کورٹ نے حال ہی میں شہر میں بھاری ٹریفک کے داخلے پر پابندی سے متعلق ایک درخواست پر سماعت کی اور حکم دیا کہ ایسی گاڑیوں کو صبح 7 بجے سے رات 11 بجے تک محدود رکھا جائے۔ خلاف ورزی کرنے والوں کو گاڑی ضبط کرنے کا سامنا کرنا پڑے گا۔

کراچی میں تیز رفتار ڈمپرز موت بانٹنے لگے، چند گھنٹوں میں 6 افراد جاں بحق

انہوں نے کہا کہ رپورٹس بتاتی ہیں کہ نفاذ بدستور متضاد ہے، آئے روز ڈمپر حادثات سے عوامی تحفظ کے خدشات بڑھ رہے ہیں۔

گورنر سندھ کامران ٹیسوری نے خط میں کہا کہ سندھ ہائی کورٹ اپنی ہدایات پر سختی سے عمل درآمد کو یقینی بنائے اور حادثات میں اہم کردار ادا کرنے والی انتظامی کوتاہیوں کا نوٹس لے۔

کراچی میں دندناتے ڈمپرزنے 24 گھنٹوں میں مزید 8 زندگیاں روند دیں، گورنر وصوبائی وزیرکی سخت ہدایات

ان کا خط میں مزید کہنا تھا کہ معصوم جانوں کا ضیاع ناقابل قبول ہے، عوام ڈمپر،ٹینکرز کیخلاف فیصلہ کن کارروائی کے لیے عدالت کی طرف دیکھ رہے ہیں۔

ان کا مزید کہنا تھا کہ مجھے یقین ہے کہ معزز ہائی کورٹ اس اہم مسئلے کا فوری نوٹس لے گی اور اس بحران سے مؤثر طریقے سے نمٹنے کے لیے ضروری ہدایات فراہم کرے گی۔