مسلم لیگ (ن) کی ترجمان مریم اورنگزیب نے کہا کہ عوام نے 2018 میں چوری شدہ مینڈیٹ واپس کیا، احتجاج کس بات پر کیا جارہا ہے، پنجاب میں تجاوزات کے خلاف آپریشن سیاسی نہیں، مشکل فیصلہ تھا، تجاوزات ہٹاکر باقاعدہ جگہ دی گئی اور ریڑھی بانوں کو بھی جگہ کے ساتھ ریڑھیاں دی گئی ہیں۔

آج نیوز کے پروگرام “ روبرو“ میں گفتگو کرتے ہوئے مسلم لیگ (ن) کی ترجمان اور سینئر صوبائی وزیر مریم اورنگزیب نے کہا کہ رمضان شوگرمل کیس نیب نیازی گٹھ جوڑ کا نتیجہ تھا، آج عدالت کا فیصلہ ان کے منہ پر تماچہ ہے، نوازشریف دور میں ایک پیسے کی کرپشن ثابت نہ ہوسکی۔

مریم اورنگزیب نے مزید کہا کہ آج ہم سرخرو ہوگئے، اللہ کا شکر ادا کرتے ہیں، ہم نے آج تک اڈیالہ میں کھانا بند کرنے کا نہیں کہا، ہمارا مقصد انتقامی سیاست کا نشانہ بنانا نہیں۔

ان کا کہنا تھا کہ پی ٹی آئی ہروقت احتجاج ہی کرتی رہتی ہے، انہوں نے ساڑھے 4 سال میں کوئی کام نہیں کیا، 2018 میں چوری شدہ مینڈیٹ عوام نے واپس کیا ہے، تجاوزات کے خلاف آپریشن سیاسی فیصلہ نہیں، تجاوزات ہٹاکر باقاعدہ جگہ دی گئی ہے، ریڑھی بان کو جگہ کے ساتھ ریڑھیاں دی گئی ہیں۔

اسموگ کے حوالے سے بات کرتے ہوئے ن لیگ کی ترجمان نے کہا کہ اسموگ کے خاتمے کے لیے اقدامات کیے جارہے ہیں، اسموگ کے خاتمے کے لیے ہمیں اپنی سوچ کو بدلنا ہوگا۔

محمد زبیر

اس موقع پر پروگرام میں گفتگو کرتے ہوئے سابق گورنر سندھ محمد زبیر نے کہا کہ بانی پی ٹی آئی عمران خان نے آرمی چیف کو خط لکھا ہے، خط لکھنے کا کوئی نتیجہ نہیں نکلے گا۔

محمد زبیر نے کہا کہ سب کو علم ہے کہ شہبازشریف کے پاس اختیار نہیں، شہباز شریف کو پتہ ہے کہ ان کے پاس مینڈیٹ نہیں، نواز شریف اور شہبازشریف کی سوچ میں بہت فرق ہے۔

انہوں نے مزید کہا کہ گرینڈ الائنس کا مقصد ملک کو آگے لے کر چلنے کے لیے ہونا چاہئے، آرمی چیف کو خط لکھنے میں کوئی خرابی نہیں۔

مصطفی نواز کھوکھر

سینئر سیاستدان مصطفی نواز کھوکھر نے بھی گفتگو کرتے ہوئے کہا کہ ہمیں ملکی مفاد میں سوچ کو پروان چڑھانا ہوگا، حکمران عوام کی رائے کیوں مقدم رکھیں گے، حکمرانوں کو عوامی رائے کے خلاف مسلط کیا گیا، نوجوان مایوس ہوکر باہر جانے کا سوچ رہے ہیں۔

انہوں نے مزید کہا کہ خیبرپختونخوا اور بلوچستان میں دہشت گردی بڑھ رہی ہے، موجودہ حکمران ناکام ہوچکے ہیں، موجودہ حکمرانوں کو عوام کا اعتماد حاصل نہیں۔

مصطفی نواز کھوکھر کا کہنا تھا کہ وفاق اوربلوچستان کی حکومت کی اخلاقی حیثیت نہیں، ہمیں صاف اور شفاف انتخابات کی جانب جانا چاہیئے۔