معروف بالی ووڈ اداکار ارجن کپور نے ملائیکہ اروڑا سے تعلقات ختم ہونے کے بعد اپنی شادی کے بارے میں اشارہ دے دیا ہے۔

نوجوان اداکار ارجن کپور ان دنوں اپنی فلم ’’میرے ہسبینڈ کی بیوی‘‘ کی پروموشن میں مصروف ہیں، اس دوران انھوں نے میڈیا کو اپنی شادی کے منصوبے کے بارے میں بتایا۔

فلم ’’میرے ہسبینڈ کی بیوی‘‘ کی پروموشن کے دوران بالی ووڈ اداکار سے ان کی شادی سے متعلق سوال کیا گیا تھا، جس کے جواب میں ارجن نے کہا کہ جب وقت آئے گا تو آپ سب کو بتاؤں گا۔

سپرہٹ فلمیں دینے والے بھارتی اداکار نے کہا کہ جب شادی کا وقت آئے گا تو وہ اس خبر کو مداحوں کے ساتھ ضرور شیئر کرنا پسند کروں گا۔

انہوں نے مزید کہا کہ میں نے اپنی ذاتی زندگی کے بارے میں کافی باتیں کی ہیں، لیکن آج ہم صرف فلم کی بات کریں گے، کیونکہ یہ فلم کے جشن کا وقت ہے۔

بالی ووڈ اداکار ارجن کپور، راکول پریت سنگھ اور بھومی پڈنیکر اپنی نئی رومانٹک کامیڈی فلم ’’میرے ہسبینڈ کی بیوی‘‘ میں ایک ساتھ نظر آئیں گے، فلم کی ریلیز سے قبل تینوں اداکار فلم کی پروموشن میں مصروف ہیں۔

یاد رہے کہ کچھ عرصہ قبل ہی اسمارٹ فلمی ہیرو ارجن کپور نے اداکارہ ملائیکہ اروڑا سے اپنے تعلقات ختم کرنے کا اعلان کیا تھا۔