سپریم کورٹ کی جسٹس عائشہ ملک نے کسٹم ریگولیٹر ڈیوٹی کیس سننے سے معذرت کی تحریری وجوہات جاری کردی ہیں۔

جسٹس عائشہ ملک نے اپنے نوٹ میں لکھا کہ بحیثیت جج، ہمیں عدالتی احکامات اور انتظامی احکامات کے درمیان واضح فرق کو سختی سے برقرار رکھنا چاہیے، اور عدالتی احکامات کی تقدیس کو محفوظ اور برقرار رکھنا چاہیے۔

جسٹس عائشہ ملک نے لکھا کہ ہمیں یہ یقینی بنانا چاہیے کہ ہمارے احکامات پر عمل ہو، ہمارے احکامات کی کسی کے ذریعہ نظرانداز یا خلاف ورزی نہ کی جائے۔

جسٹس عائشہ ملک نے نوٹ میں لکھا کہ ججز کمیٹیوں نے عدالتی حکم کو خاطر میں نہ لاتے ہوئے بنچ سے کیس واپس لے لیا، عدالتی حکم انتظامی احکامات سے ختم نہیں کیا جا سکتا، عدالتی احکامات کو ہمیشہ عدالت میں احترام کی نظر سے دیکھنے کی روایت ہے۔

انہوں نے مزید لکھا کہ عدالتی حکم عدلیہ کی آزادی اور اختیارات کا مظہر ہوتا ہے، اگر عدالتی حکم سے اختلاف ہو تو عدالتی سطح پر ہی حل نکالا جاتا ہے، انتظامی احکامات سے عدالتی حکم کو مسترد کرنا عدلیہ کی آزادی اور تقدس کے خلاف ہے۔

جسٹس عائشہ ملک نے لکھا کہ بطور جج یقینی بنانا چاہئیے کہ عدالتی احکامات پر عملدرآمد کیا جائے۔