دوسرے ٹیسٹ میں ویسٹ انڈیز کی پوری ٹیم پہلی اننگز میں 163 رنز پر ڈھیر ہوگئی،، پاکستانی اسپنرز کے سامنے مہمان ٹیم نے پھر گھٹنے ٹیک دیئے۔ نعمان علی ٹیسٹ میں ہیٹ ٹرک کرنے والے پہلے پاکستانی اسپنر بن گئے، جنہوں نےاننگز میں چھ اور ساجد خان نے دو وکٹیں اڑائیں۔ آٹھ وکٹیں گرنے کے بعد ویسٹ انڈیز کے ٹیل اینڈرزنے شاندار بیٹنگ کا مظاہرہ کیا۔ نویں نمبر پر بیٹںگ کرنے والے موٹی نے فائٹنگ ففٹی بنائی۔

دوسرے اور آخری ٹیسٹ میں پاکستان کی تباہ کن بولنگ نے ویسٹ انڈین بیٹنگ لائن کو ٹکنے نہ دیا، ویسٹ انڈیز کے 9 کھلاڑی 95 رنز پر پویلین لوٹ گئے ہیں۔

ملتان کے انٹرنیشنل کرکٹ اسٹیڈیم میں کھیلے جا رہے میچ میں ویسٹ انڈین کپتان کریگ بریتھ ویٹ نے ٹاس جیت کر پہلے بیٹنگ کا فیصلہ کیا۔

ویسٹ انڈیز کے کریگ بریتھ ویٹ اور مائیکل لوئس نے اننگز کا آغاز کیا تاہم 8 کے مجموعے پر پاکستان کی جانب سے ڈیبیو کرنے والے فاسٹ بولر کاشف علی نے اپنے اوور میں مائیکل لوئس کی وکٹ حاصل کی۔

پاکستان کی جانب سے دوسری وکٹ ساجد خان نے حاصل کی، انہوں نے عامر جنگو کو اپنا شکار بنایا، پھر نعمان علی کی باری آئی تو انہوں نے ویسٹ انڈین کھلاڑیوں کو ٹکنے نہ دیا اور یکے بعد دیگرے 4 کھلاڑیوں کو پویلین کی راہ دکھائی۔

نعمان علی نے ہیٹ ٹرک بھی اسکور کی اور وہ ٹیسٹ میچ میں پاکستان کی طرف سے ہیٹ ٹرک کرنے والے پہلے اسپنر ہیں۔

خیال رہے کہ 2 ٹیسٹ میچوں کی سیریز میں پاکستان کو ایک صفر کی سبقت حاصل ہے، پاکستان نے ویسٹ انڈیز کو ملتان میں ہی کھیلے گئے پہلے میچ میں 127 رنز سے شکست دی تھی جب کہ پاکستان کی جانب سے تمام 20 وکٹیں اسپنرز نے حاصل کی تھیں۔