پاراچنار ٹل مین شاہراہ آج بھی ہر قسم آمد و رفت کیلئے بند ہے اور راستوں کی بندش کے باعث شہریوں کو شدید مشکلات کا سامنا ہے، اشیائے ضروریہ نہ ملنے کی وجہ سے شہری در بدر پھیر رہے ہیں۔ سرکاری ذرائع کے مطابق مندوری میں دھرنا کے باعث بن آمد و رفت کے راستے بند ہیں۔

تاجر برادری کا کہنا ہے کہ 40 گاڑیوں پر مشتمل قافلہ آج بھی ٹل سے پاراچنار کی جانب منتظر ہیں، اپر کرم کے لوگوں کے مشکلات حل ہونے کیلئے کم از کم 500 ٹرک درکار ہیں۔

میڈیکل سپرنٹینڈنٹ ڈسٹرکٹ ہیڈ کوارٹر اسپتال پاراچنار ڈاکٹر سید میر حسن جان کا کہنا ہے کہ باہر میڈیکلز میں تمام ادویات ختم ہوچکی ہیں، عوام نے ڈی ایچ کیو اسپتال کا رخ کیا ہے، اسپتال میں روزانہ 2300 سے لے کر 2500 افراد چیک اپ کیلئے آتے ہیں، اسپتال میں ایمرجنسی کیلئے ادویات موجود ہیں۔

دوسری جانب میڈیکل یونینز کا کہنا ہے کہ باہر مارکیٹ میں ضرورت کے ادویات موجود نہیں ہیں، گزشتہ روز قافلے میں ایک بھی میڈیسن کی گاڑی نہیں تھی۔

لوئر کرم مندوری میں دھرنا آج بھی جاری ہے، دھرنے کے شرکاء کا کہنا ہے کہ بگن متاثرین کیلئے ریلیف پیکج دیا جائے، نقصانات کا ازالہ کیا جائے، مطالبات نہ ماننے تک دھرنا جاری رہے گا۔

پولیس کا کہنا ہے کہ روڈ کو محفوظ بنانے کیلئے اقدامات اٹھائے جا رہے ہیں، راستے کلیئر ہوتے ہی قافلہ کو روانہ کیا جائے گا۔