ایوان صدر نے سوشل میڈیا پر زیر گردش ڈاکٹر سہیل انجم نامی جعلساز کی ایوان صدر میں گریڈ 21 کی پوسٹ پر تعیناتی کے نوٹیفکیشن کی تردید کردی۔

اس حوالے سے ایوانِ صدر کا کہنا ہے کہ ایوان صدر میں ڈاکٹر سہیل انجم کی تعیناتی کا نوٹیفکیشن جعلی ہے، ایوانِ صدر میں گریڈ 21 میں پرسنل سیکرٹری کا کوئی عہدہ موجود نہیں ہے، ایسٹبلشمنٹ ڈویژن نے ایوانِ صدرمیں سہیل انجم نامی کسی شخص کی تعیناتی نہیں کی۔

ایون صدر کے مطابق سہیل انجم نے ایوانِ صدر کے سیکرٹری جنرل کے پرسنل سیکرٹری کے کارڈز بھی چھپوا رکھے ہیں، ایوان صدر میں سیکرٹری جنرل اور اس کے پرسنل سیکرٹری کا کوئی عہدہ موجود نہیں۔

ایوانِ صدر میں افسران کی تعیناتی شفافیت اور دیانتداری کی بنیاد پر کی جاتی ہے، جعلی نوٹیفکیشن کی تحقیقات کے لیے معاملہ ایف آئی اے کو بھجوا دیا گیا ہے۔