احتساب عدالت لاہور نے ترقیاتی منصوبوں میں مبینہ کرپشن ریفرنس کی گزشتہ سماعت کا تحریری حکمنامہ جاری کر دیا۔

عدالت نے محمد خان بھٹی سمیت دیگر ملزمان پر فرد جرم عائد کردی جبکہ پرویز الہی کو فرد جرم عائد کرنے کے لیے 7 جنوری کو طلب کرلیا۔

احتساب عدالت لاہور نے محمد خان بھٹی سمیت دیگر پر فرد جرم عائد کرنے کا تحریری حکم جاری کردیا۔ عدالت نے تحریر کیا کہ عدالت کو تمام ملزمان کی حاضری مکمل کرنے میں کافی دشواری ہے۔

عدالت نے تحریر کیا کہ تاریخ پر تمام ملزمان حاضر ہوتے تو عدالت فرد جرم عائد کرتی مگرعدالت محسوس کرتی ہے حاضر ملزمان پر فرد جرم عائد کی جائے۔ عدالت کسی قسم کی مزید تاخیر نہیں کرسکتی۔

عدالت محمد خان بھٹی ،خالد محمود چھٹہ ،آصف محمود ،نعیم اقبال ،محمد اصغر اور اسد علی پر فرد جرم عائد کرتی ہے۔

عدالت نے تحریر کیا کہ گزشتہ سماعت پر محمد خان بھٹی کو میڈیکل گروانڈ پر حاضری معافی دی تھی۔ آج پرویز الہی کی میڈیکل کی حاضری معافی کی درخواست پیش ہوئی۔ عدالت پرویز الہی کی ایک روزہ حاضری معافی کی درخواست منظور کرتی ہے۔

عدالت نے مبینہ ترقیاتی منصوبوں میں کرپشن ریفرنس میں پرویز الہی کو فرد جرم عائد کرنے کے لیے سات جنوری کو طلب کرلیا۔