بزنس ریکارڈر گروپ کے ڈپٹی چیف ایگزیکٹو ارشد زبیری انتقال کرگئے
بزنس ریکارڈر گروپ کے ڈپٹی چیف ایگزیکٹو ارشد زبیری طویل علالت کے بعد انتقال کرگئے۔
معرف صحافی اور اکنامک جنرلزم کے پائینیر ارشد زبیری 72 سال کی عمر میں کراچی میں انتقال کرگئے، ارشد زبیری طویل عرصے سے علیل تھے۔
ارشد زبیری کے اہل خانہ نے اتوار کو تصدیق کی، ان کے پسماندگان میں ان کی اہلیہ اور 3 بچے ہیں۔
ارشد زبیری کی نماز جنازہ کل دوپہر ڈیڑھ بجے مسجد نورالسلام زمزمہ پارک ڈیفنس میں ادا کی جائے گی۔
ارشد زبیری بزنس ریکارڈر گروپ کے ڈپٹی چیف ایگزیکٹو تھے اور اکنامک جنرلزم میں ارشد زبیری کا نمایاں کردار رہا۔
وزیر توانائی سندھ ناصر شاہ کا اظہار افسوس
وزیر توانائی سندھ ناصر شاہ نے معروف صحافی ارشد زبیری کے انتقال پر افسوس کا اظہار کرتے ہوئے کہا ہے کہ ارشد زبیری دنیائے صحافت کے درخشاں ستارے تھے، ارشد زبیری کی وفات سے پیدا ہونے والا خلا کبھی پر نہیں ہوسکے گا۔
ناصر شاہ نے کہا کہ مرحوم کی وفات پر اہل خانہ اور ادارے کے اسٹاف سے تعزیت کرتا ہوں، اللہ تعالیٰ مرحوم کو اپنے جوار رحمت میں جگہ عطا فرمائے، مرحوم کے لواحقین اور احباب کو صبر و جمیل عطا فرمائے۔
آئی جی سندھ غلام نبی میمن کا اظہار افسوس
آئی جی سندھ غلام نبی میمن نے بھی ارشد زبیری کے انتقال پر افسوس کا اظہار کرتے ہوئے کہا ہے کہ ارشد زبیری صحافتی برادری میں بڑا نام تھے، دعا ہے اللہ مرحوم کے درجات بلند کریں، اللہ لواحقین کو صبر و جمیل عطا فرمائے۔
ارشد زبیری کی زندگی پر ایک نظر
جناب ارشد زبیری نے 1973 میں امریکا سے مکینیکل انجینئرنگ میں بی ایس کی ڈگری حاصل کی اور 1974 میں ٹیکنیکل ڈائریکٹر کی حیثیت سے اپیکس پرنٹری میں شمولیت اختیار کی۔
وہ بینک دستاویزات کی سیکورٹی پرنٹنگ کے ذمہ دار تھے، جناب زبیری نے 1976 میں کاروباری فارم اسٹیشنری کی مسلسل تیاری کے لیے ایک شعبہ شروع کیا۔
اس کے بعد وہ 1981 میں ڈیلی بزنس ریکارڈر کے پرنٹر اور پبلشر بن گئے، 1983 میں انہیں یہ ذمہ داری سونپی گئی کہ وہ ٹولز کا انتخاب کریں اور خبر کی ترتیب کو ہاٹ میٹل سے کولڈ سیٹ کمپیوٹرائزڈ فلم سیٹ میں تبدیل کریں۔
1985 میں ارشد اے زبیری کو ڈپٹی چیف ایگزیکٹو کے عہدے پر ترقی دی گئی، اور وہ انتظامیہ، اکاؤنٹس اور اشتہارات کے معاملات سنبھالتے رہے۔
پاکستان میں بزنس اور فنانشل جرنلزم کے بانی اور ان کے مرحوم والد جناب ایم اے زبیری کی جانب سے قائم کردہ بزنس ریکارڈر جناب ارشد زبیری کی قیادت میں کئی گنا ترقی کر چکا ہے۔
جناب ارشد زبیری کو مالیاتی اور مانیٹری پالیسی کے انسٹرومنٹس اور مجموعی معشیت سے متعلق کلیہ حاصل تھا۔ انہوں نے اپنے علم کو تحقیقاتی مہارتوں کے ساتھ یکجا کیا اور بے خوف و خطر غیر اخلاقی طریقوں کو بے نقاب کیا۔
ان کے اداریوں نے کنٹرولڈ معیشت کو ڈی ریگولیٹ کرنے اور آزاد بنانے میں کامیابیاں حاصل کیں اور بینکنگ اور کارپوریٹ ریگولیٹرز کو اپنی نگرانی کو بہتر بنانے میں مدد دی۔ معیشت کو دستاویزی شکل دینے اور ٹیکس کے دائرہ کو وسیع کرنے میں ان کا کردار انہیں قابل قدر ذریعہ بنادیا۔
ارشد زبیری نے متعدد بار آل پاکستان نیوز پیپر سوسائٹی کے سیکرٹری جنرل کی حیثیت سے خدمات انجام دیں۔ ان کے دور میں اے پی این ایس اخبارات کے اشتہارات کے لئے ایک موثر کلیئرنگ ہاؤس بن گیا۔ وہ پاکستان براڈکاسٹرز ایسوسی ایشن (پی بی اے) کے بانی رکن اور پہلے سیکرٹری جنرل بھی تھے جو ٹیلی ویژن اور ریڈیو براڈکاسٹرز کی نمائندگی کرنے والا ادارہ ہے۔
انہوں نے 2010 سے 2013 تک ایف بی آر کے ٹیکس ریفارم کوآرڈینیشن (ٹی آر سی) کے رکن کی حیثیت سے خدمات انجام دیں۔