کم لاگت والی سعودی ائیرلائن فلائی اے ڈیل ’Flyadeal‘ نے 2 فروری 2025 سے پاکستان کے تجارتی مرکز کراچی کے لیے شیڈول پروازیں شروع کرنے کے منصوبے کا اعلان کیا ہے۔

ایئر لائن حکام کے بیان کے مطابق یہ اقدام اس کی بین الاقوامی توسیعی حکمت عملی میں ایک اہم سنگ میل کی نشاندہی کرتا ہے اور یہ پاکستان اور جنوبی ایشیا کے لیے اس کی پہلی شیڈول سروس کی بھی نمائندگی کرتا ہے۔

رپورٹ کے مطابق 2 فروری سے فلائی اے ڈیل کی کراچی سے سعودی عرب کے شہر ریاض اور جدہ کے لیے ہفتے میں دو پروازیں ہوں گی۔ ایئر لائن کے سی ای او سٹیون گرین وے نے کہا کہ وہ جلد ہی پاکستان کے دیگر شہروں کے لیے مزید پروازیں شامل کرنے کا ارادہ رکھتے ہیں۔

ائیرلائن کے سی ای او سٹیون گرین وے نے کراچی کو ایک نئی منزل بنانے کے لیے مل کر کام کرنے پر پاکستانی حکام اور ان کی ٹیم کی تعریف کی۔ انہوں نے کہا کہ چونکہ سعودی عرب اور پاکستان کے درمیان مضبوط ثقافتی اور تاریخی تعلقات ہیں، اور بہت سے لوگ دونوں ممالک کے درمیان کاروبار، زیارت یا خاندان سے ملنے کے لیے سفر کرتے ہیں، اس لیے ایئر لائن کے لیے اس روٹ پر پرواز شروع کرنے کا منصوبہ بنایا۔

سعودی ایئرلائن نے پاکستانی حجاج کو اچھی خبر سُنادی

انہوں نے بتایا کہ ایئر لائن رواں برس کے آغاز میں پاکستان کے لیے خصوصی حج چارٹر پروازیں چلانے میں کامیاب رہی تھی۔ ان کا کہنا تھا کہ کراچی کے لیے پروازیں شروع کرنا ایئرلائن کے لیے ایک بڑا قدم ہے، کیونکہ یہ جنوبی ایشیا کے لیے ان کی پہلی باقاعدہ پرواز ہے۔

پاکستان کے ٹکٹ اب ایئر لائن کے آفیشل چینلز کے ذریعے بکنگ کے لیے دستیاب ہیں۔

سعودی عرب میں کفیل سے بھاگے تارکین وطن کیلئے بڑی رعایت کا اعلان

سعودی ائیرلائن فلائی اے ڈیل اس وقت سعودی عرب کے اندر اور باہر تقریباً 30 مقامات پر پرواز کرتا ہے۔ ان مقامات میں یورپ، مشرق وسطیٰ اور شمالی افریقہ کے شہر شامل ہیں اور پروازیں ایئر لائن کے مرکز ریاض، جدہ اور دمام سے روانہ ہوتی ہیں۔

ایئر لائن کی توسیع جنوری 2025 تک جاری ہے، جس میں دمام سے نجران، تبوک اور ینبو کے لیے نئی گھریلو پروازوں کے ساتھ ساتھ ریاض اور جدہ سے عمان، اردن کے لیے نئی سروسز، تمام ہی کا آغاز یکم جنوری سے ہوگا۔