جنوبی افریقا نے پہلے ٹی 20 میں پاکستان کو 11 رنز سے شکست دے کر 3 میچز کی سیریز میں 0-1 کی برتری حاصل کرلی۔

جنوبی افریقا نے 3 ٹی ٹوئنٹی میچز کی سیریز کے پہلے میچ میں پہلے کھیلتے ہوئے پاکستان کو جیت کے لیے 184 رنز کا ہدف دیا، جس کے تعاقب میں قومی ٹیم مقررہ 20 اوورز میں 8 وکٹوں کے نقصان پر 172 رنز اسکور کرپائی۔

پاکستان اور جنوبی افریقا کے درمیان پہلا ٹی ٹوئنٹی میچ ڈربن میں کھیلا گیا جہاں جنوبی افریقی کپتان ہینرک کلاسن نے ٹاس جیت کر پہلے بیٹنگ کرنے کا فیصلہ کیا۔

پہلی اننگز

پہلے بیٹنگ کرتے ہوئے میزبان ٹیم کی ابتدائی وکٹیں جلد گرگئیں، ریزا ہینڈرکس 8، رسی وین ڈیر ڈوسن صفر اور میتھیو بریٹکزے 8 رنز بنا کر پویلین لوٹ گئے۔

ان کے بعد آنے والے ڈیوڈ ملر نے ٹیم کی بیٹنگ لائن کو سہارا دیا اور جارحانہ بلے بازی کرتے ہوئے 8 چھکوں اور 4 چوکوں کی مدد سے 40 گیندوں پر 82 رنز بنا کر آؤٹ ہوئے، انہیں فاسٹ باؤلر شاہین شاہ آفریدی نے میدان بدر کیا۔

پہلا ٹی 20، پاکستان کو جیت کے لیے 184 رنز درکار

ان کے بعد آنے والے بلے باز جنوبی افریقی کپتان ہنرکس کلاسن کا قیام وکٹ پر زیادہ طویل نہیں رہا اور 12 رنز بنا کر واپس پویلین لوٹ گئے، ڈینوون فریرا 7 رنز بنا کر آؤٹ ہوئے جب کہ جارج لنڈے 24 گیندوں پر 48 رنز بنا کر آؤٹ ہوئے۔

اس طرح جنوبی افریقہ نے پاکستان کے خلاف 3 میچوں کی سیریز کے پہلے میچ میں پہلے بیٹنگ کرتے ہوئے مقررہ 20 اوررز میں 9 وکٹ پر 183 رنز بنائے اور مہمان ٹیم کو جیت کے لیے 184 رنز کا ہدف دیا۔

پاکستان کی جانب سے شاہین آفریدی اور ابرار احمد نے 3،3 وکٹیں حاصل کیں جبکہ عباس آفریدی نے 2 اور سفیان نے ایک کھلاڑی کو آؤٹ کیا۔

دوسری اننگز

184 رنز ہدف کے تعاقب میں پاکستان کا آغاز متاثر کن نہیں تھا جبکہ مایہ ناز بلے باز بابر اعظم بغیر کوئی رن بنائے آؤٹ ہوئے، ان کے بعد کپتان محمد رضوان اور صائم ایوب نے ذمے دارانہ بیٹنگ کی اور اسکور کو آگے بڑھایا، 56 کے مجموعی اسکور پر صائم ایوب 31 رنز بنا کر آؤٹ ہوئے۔

پاکستان کے تیسرے آؤٹ ہونے والے کھلاڑی عثمان خان تھے جو 9 رنز بنا سکے، چوتھے آؤٹ ہونے والے کھلاڑی طیب طاہر تھے جو 18 رنز بنا کر پویلین لوٹے۔

ان کے بعد شاہین شاہ آفریدی 9 اور عرفان خان ایک رنز بنا کر آؤٹ ہوئے، پاکستان کی جانب سے کپتان محمد رضوان سب سے زیادہ 74 رنز بنا کر آؤٹ ہوئے۔

عباس آفریدی صفر پر آؤٹ ہوئے، محمد حارث اور سفیان مقیم ناٹ آؤٹ رہے، جب کہ قومی ٹیم کے 7 کھلاڑی ڈبل فیگر میں بھی داخل نہ ہوسکے۔

اس طرح پاکستان مقررہ 20 اوورز میں 8 وکٹوں کے نقصان پر 172 رنز بنا سکا اور میزبان جنوبی افریقہ نے پہلا ٹی 20 میچ 11 رنز سے اپنے نام کرکے تین میچوں کی سیریز میں ایک صفر کی برتری حاصل کرلی۔

میزبان ٹیم کی جانب سے جارج لنڈے نے 4 اوورز میں 21 رنز دے کر 4 وکٹیں حاصل کیں، ان کے علاوہ کوینا مفاکا نے 2 کھلاڑیوں کو آؤٹ کیا۔

48 رنز بنانے کے بعد 4 وکٹیں لینے والے جارج لنڈے کو میچ کا بہترین کھلائی قرار دیا گیا۔

میچ کا ٹاس

قبل ازین ٹاس کے بعد گفتگو کرتے ہوئے جنوبی افریقا کے کپتان ہینرک کلاسن نے کہا کہ وکٹ پچھلے دو سیزن میں شاندار رہی اور امید ہے کہ ہم اسکور بورڈ پر اچھا ٹارکٹ سیٹ کرکے مخالف پر دباؤ ڈال سکتے ہیں، ہم آج رات سے سیزن کا اچھا آغاز چاہتے ہیں۔

دورہ جنوبی افریقا میں کن کھلاڑیوں کی واپسی ہوسکتی ہے؟ نام سامنے آگئے

انہوں نے کہا کہ نئے لڑکوں کو موقع مل رہا ہے، لگتا ہے کہ ہمیں 2026 ورلڈ کپ پر نظر رکھتے ہوئے اپنے پول کو بڑھانے کی ضرورت ہے، بہت سارے لڑکوں کا کافی لمبا اور مصروف سیزن تھا، اس لیے اس انہیں آرام دیا گیا ہے۔

پروٹیز کپتان نے کہا کہ نئے آنے والے لڑکوں کے لیے بھی یہ مناسب موقع ہے، دیکھیں پاکستان کے پاس معیاری باؤلنگ اٹیک ہے، تجربہ کار بیٹنگ لائن اپ ہے، وہ کافی کرکٹ کھیل رہے ہیں اور اچھا مقابلہ ہونے والا ہے۔

قبل ازیں، جنوبی افریقہ کے خلاف پہلے ٹی 20 کے لیے پاکستان کی پلیئنگ الیون کا اعلان کر دیا گیا۔

پی سی بی کی جانب سے جاری اعلامیے کے مطابق محمد رضوان کپتانی کے فرائض انجام دیں گے۔

اس کے علاوہ ٹیم میں صائم ایوب، بابراعظم، عثمان خان، طیب طاہر، عرفان خان، عباس آفریدی، شاہین شاہ آفریدی شامل ہیں۔

اسی طرح حارث رؤف، سفیان مقیم اور ابرار احمد کو بھی پلیئنگ الیون کا حصہ بنایا گیا ہے۔