دنیا کا سب سے بڑا سونے کا ذخیرہ چین میں دریافت ہوا ہے۔

وسطی چین کے صوبہ ہنان میں دنیا کا سب سے بڑا سونے کا ذخیرہ دریافت ہوا ہے۔ اس میں تقریباً ایک ہزار میٹرک ٹن اعلیٰ معیار کے گولڈ کی موجودگی کا انکشاف ہوا ہے۔ اس دریافت کی تصدیق صوبہ ہنان کے جیولوجیکل بیورو نے کی۔

چین کے سرکاری میڈیا کے مطابق سونے کے اس ذخائر کی مالیت تقریباً 83 ارب امریکی ڈالرز سے زائد بتائی جا رہی ہے۔ سونے کی اس بڑی دریافت نے جنوبی افریقہ میں ایک کان میں پائے جانے والے 930 میٹرک ٹن کو بھی پیچھے چھوڑ دیا ہے۔

مقامی میڈیا کے مطابق ابتدائی تحقیقات سے معلوم ہوا ہے کہ کان میں 2 کلومیٹر کی گہرائی میں تقریباً 300 میٹرک ٹن سونا ہونے کا معلوم ہوا ہے جبکہ یہاں زیادہ گہرائی میں مزید ذخائر ہونے کا اندازہ لگایا گیا ہے۔

مذکورہ دریافت چین کی سونے کی صنعت کے لیے ایک بڑا سودا ہے اور اس سے چین کی معیشت کو فروغ میں مدد مل سکتی ہے۔

مائننگ ٹیکنالوجی کے مطابق چینی سونے کے ذخائر کی دریافت سے قبل دنیا میں سونے کے سب سے بڑے ذخائر جنوبی افریقا، انڈونیشیا، روس، چلی، امریکا اور دیگر ممالک میں موجود ہیں۔