اسلام آباد: الیکٹرک وہیکلز (ای وی) چارجنگ اسٹیشنز کے قیام کے لیے نئے ٹیرف کے تعین کے حوالے سے حکومت کی بے حسی نہ صرف صارفین بلکہ ان کمپنیوں پر بھی منفی اثر ڈال رہی ہے جو چارجنگ پوائنٹس قائم کرنا چاہتی ہیں۔

بزنس ریکارڈر کی رپورٹ کے مطابق ذرائع نے بتایا کہ نیشنل الیکٹرک پاور ریگولیٹری اتھارٹی (نیپرا) اور نیشنل انرجی ایفیشنسی اینڈ کنزرویشن اتھارٹی (نیکا) جو ای وی چارجنگ اسٹیشنز کے لیے نئے ٹیرف کا تعین کرنے کے لیے ذمہ دار ہیں، ابھی تک کسی اتفاق رائے تک پہنچنے میں ناکام رہے ہیں۔

اٹک پیٹرولیم لمیٹڈ نے این ای سی اے کو لکھے گئے خط میں 27 ستمبر 2024 کو ہونے والے ذیلی گروپ کے اجلاس کے فیصلوں کا حوالہ دیا جس میں موٹر ویز، نیشنل ہائی ویز اور پاکستان کے بڑے شہروں پر ای وی چارجنگ اسٹیشنز کے مقامات کو حتمی شکل دی گئی تھی۔

خط کے مطابق اٹک پیٹرولیم لمیٹڈ نے دو مقامات پر پاکستان کا پہلا الیکٹرک وہیکل چارجنگ اسٹیشن نصب کیا ہے اور جولائی 2020 سے ای وی اسٹیشن دارالحکومت کے صارفین کے لیے 180 کلو واٹ فاسٹ چارجنگ کی سہولت فراہم کر رہا ہے۔

تاہم، متعدد اجلاس کے باوجود لیسکو نے الیکٹرک وہیکل چارجنگ اسٹیشن ٹیرف A 2(d) فراہم کرنے کی درخواست کو اس بہانے سے مسترد کر دیا کہ ایک ہی جگہ/ٹرانسفارمر پر مختلف ٹیرف والے متعدد الیکٹرک میٹر لگانے کی کوئی پالیسی نہیں ہے۔

کمپنی کے مطابق پاکستان بھر میں الیکٹرک وہیکل اسٹیشنوں کی حوصلہ افزائی کے لیے حکومتی اقدام کی روشنی میں آئیسکو سپرنٹنڈنٹ انجینئر اور ڈائریکٹوریٹ آف کنزیومر افیئرز کے ساتھ دوبارہ معاملہ اٹھایا۔

اگرچہ لیسکو حکومتی اقدام کی حمایت کرتا ہے تاہم اسے نیپرا سے بنیادی ڈھانچے کی پالیسی کے رہنما خطوط کی ضرورت ہے تاکہ اس جگہ پر الیکٹرک وہیکل چارجنگ ٹیرف فراہم کیا جا سکے جہاں الیکٹرک وہیکل چارجرز کے ساتھ فیول اسٹیشن اور نان فیولنگ کی سہولت بھی کام کر رہی ہو۔