بھارت میں ایک شخص پٹاخوں کے ڈبے پر بیٹھنے کا چیلنج اور جان دونوں ہار گیا۔ اس چیلنج کو جیتنے کی صورت میں آٹو رکشہ انعام میں ملتا۔

جنوبی بھارت کی ریاست کرناٹک کے علاقے کوننا کنٹے میں رونما ہونے والے اس واقعے کی ویڈیو وائرل ہونے پر بنگلور پولیس نے 6 افراد کو گرفتار کرلیا۔

32 سالہ سبارِش نے دوستوں سے شرط لگائی کہ وہ پٹاخوں کے ڈبے پر بیٹھے گا اور پٹاخوں کو جھیل کر دکھائے گا۔ دوستوں نے وعدہ کیا کہ اُسے انعام میں آٹو رکشہ دیں گے۔

دیوالی کی رات رونما ہونے والے اس واقعے کی ویڈیو سوشل میڈیا پر وائرل ہوئی ہے۔ سبارِش نے بھی، اپنے دوستوں کی طرح، پی رکھی تھی اور یوں وہ انتہائی خطرناک چیلنج کا سامنا کرنے کے لیے تیار ہوگیا۔

سبارش پٹاخوں کے ڈبے پر بیٹھا اور دوستوں نے ڈبے کو آگ لگادی۔ دھماکا ہوتے ہی سبارِش گرگیا۔ وہ بُری طرح جھلس گیا تھا۔ دوست اُسے فوراً گاڑی میں بٹھاکر اسپتال لے گئے۔

سبارِش کو بچانے کی طبی عملے نے بہت کوشش کی مگر وہ جانبر نہ ہوسکا۔ جنوبی بنگلور کے ڈپٹی کمشنر آف پولیس نے بتایا ہے کہ تمام (6) ملزمان کو گرفتار کرکے عدالت میں بھی پیش کردیا گیا ہے۔ ان کے خلاف قتلِ انسانی کا مقدمہ درج کیا گیا ہے۔