اسلام آباد ہائی کورٹ نے توشہ خانہ ٹو کیس میں بانی پی ٹی آئی کی درخواست ضمانت پر اعتراضات دور کردیئے۔رجسٹرار آفس کو پیر کو کیس سماعت کے لیے مقرر کرنے کی ہدایت کردی۔

اسلام آباد ہائی کورٹ کے جسٹس میاں گل حسن اورنگزیب نے کیس کی سماعت کی ۔بانی پی ٹی آئی کی جانب سے عائشہ خالد، شاہینہ شہاب و دیگر وکلاء عدالت پیش ہوئے۔

بانی کی توشہ خانہ ٹو کیس میں ضمانت کی درخواست پر عدالت نے درخواستگزار کے وکیل سے استفسار کیا کہ یہ کیا ہے؟ اور اس پر تو رجسٹرار آفس کے اعتراضات ہیں۔

جسٹس میاں گل حسن اورنگزیب نے درخواستگزار کے وکیل سے مکالمہ کرتے ہوئے ریمارکس دیے کہ آپ نے کہا ہے کہ رولز آف کنسسٹینسی ہے مگر یہ تو مرد ہے۔

جسٹس میاں گل حسن اورنگزیب نے بشریٰ بی بی ضمانت کا حوالہ دیتے ہوئے کہا وہ تو عورت تھی تو تب ضمانت بنی۔کل ہی ایک ایسی درخواست انہوں نے خارج کردی۔ رجسٹرار آفس کا اعتراض ہے وکالت نامہ جولائی کا ہے اور کاز آف ایکشن نومبر کا ہے۔

عدالت نے رجسٹرار آفس کے اعتراضات دور کرتے ہوئے درخواست کو پیر کو مقرر کرنے کی ہدایت کردی۔